فينليانديا پرەمەر-مينيسترى پەتتەري ورپو بىرنەشە پارلامەنت مۇشەسىنىڭ ۇيىنە جاسالعان كۇدىكتى باسىپ كىرۋلەرگە شەتەلدىك كۇش جاۋاپتى بولۋى مۇمكىن دەپ مالىمدەدى. بەيسەنبىدە پوليسيا حەلسينكي ايماعىندا سوڭعى ءبىر جىلدا دەپۋتاتتاردىڭ ۇيلەرىنە باسىپ كىرۋ تۋرالى بىرنەشە حابارلامانى تەرگەپ جاتقانىن، وقيعالار كەزىندە ەشتەڭە ۇرلانباعانىن، ءبىراق باسىپ كىرۋدىڭ ارەڭ بايقالاتىن بەلگىلەرى قالدىرىلعانىن حابارلادى. ءجۋرناليستىڭ كۇدىكتى باسىپ كىرۋلەرگە شەتەلدىك كۇش قاتىستى بولۋى مۇمكىن بە دەگەن سۇراعىنا ورپو: «بۇل وتە مۇمكىن. قازىرگى زاماندا ابدەن مۇمكىن. ەگەر بىرەۋ فينليانديانى، ءبىزدىڭ قاۋىپسىزدىك سەزىمىمىزدى نەمەسە، ايتالىق، ۋكراينانى قولداۋىمىزدى تۇراقسىزداندىرۋعا تىرىسسا، ول كەرى اسەر ەتەدى. بۇل ءبىزدىڭ بىرلىگىمىزدى نىعايتادى»، — دەدى. ونىڭ ايتۋىنشا، وقيعالاردى پوليسيا مەن ۇكىمەت ىشىندە تەرگەيدى جانە ولارعا «وتە بايىپتى قارالادى». فينليانديا پارلامەنتىنىڭ سايلاۋىنا نەبارى التى اي قالعاندا ورپو سايلاۋعا ارالاسۋ قاۋپىنە بايىپتى قاراۋ كەرەكتىگىن ايتتى. «بىرنەشە ەۋروپالىق ەلدە رەسەيدىڭ سايلاۋعا ىقپال ەتۋگە ۇمتىلعانىن كورىپ وتىرمىز»، — دەدى ول. فينليانديا رەسەيمەن ۇزىن شەكارانى بولىسەدى، ول ۋكرايناعا تولىق اۋقىمدى باسىپ كىرۋدەن جانە فينليانديانىڭ ناتو-عا كىرۋىنەن كەيىن قاتىناستاردىڭ كۇرت ناشارلاۋىنا بايلانىستى بىرنەشە جىلدان بەرى جابىق. فينليانديا پرەزيدەنتى الەكساندر ستۋبب كۇدىكتى وقيعالار تۋرالى سۇراققا: «پارلامەنت مۇشەسىنە جاسالعان شابۋىل — دەموكراتياعا جاسالعان شابۋىل. وعان ەشبىر تۇردە جول بەرىلمەۋى كەرەك جانە قابىلدانباۋى ءتيىس... مەن ءاربىر پارلامەنت مۇشەسىن قولدايمىن»، — دەدى. پارلامەنتتەگى ءباسپاسوز ءماسليحاتىندا سپيكەر يۋسسي حاللا-احو كۇدىكتى وقيعالاردىڭ ناقتى سانىن بىلمەيتىنىن، ءبىراق ول «ايتارلىقتاي» ەكەنىن ايتتى. ول بۇل مەملەكەتتىك سۋبەكتىلەرگە ءتان مىنەز-ق ۇلىق ەكەنىن اتاپ ءوتتى. «مەملەكەتتىك سۋبەكتىلەر كەيدە كۇدىكتى وقيعالارعا ۇقسايتىن ارەكەتتەرگە باراتىنى بەلگىلى، ءبىراق ءقازىر بىزدە تۇسىنىكتەمە بەرۋگە ەشقانداي اقپارات جوق جانە بولجام جاساۋدىڭ قاجەتى جوق»، — دەدى حاللا-احو. ونىڭ ايتۋىنشا، باقىلاۋلار «تامشىلاپ» جاسالعان. «بەلگىلەر ادەيى كورىنەتىندەي ەتىپ قالدىرىلعان بولۋى مۇمكىن». Yle تەلەارناسىنىڭ مالىمەتىنشە، كۇدىكتى وقيعالارعا ۇيلەردىڭ ەسىكتەرىنىڭ اشىق قالۋى جانە جارىقتىڭ قوسۋلى قالۋى جاتادى. حەلسينكي پوليسياسى پارلامەنتتەن دەپۋتاتتاردىڭ ۇيلەرىنە كۇدىكتى باسىپ كىرۋلەر تۋرالى اقپارات الىپ، الدىن الا تەرگەۋ باستاعانىن مالىمدەدى. ۆەدومستۆو ءوز مالىمدەمەسىندە: «حەلسينكي پوليسيا دەپارتامەنتى بۇل ماسەلەنى انىقتاۋدا ۇلتتىق تەرگەۋ بيۋروسىمەن تىعىز جۇمىس ىستەپ جاتىر. تەرگەۋ ەرتە كەزەڭدە، پوليسيانىڭ ءقازىر قوسىمشا تۇسىنىكتەمە بەرەتىن ەشتەڭەسى جوق»، — دەدى. بۇل تۋرالى infohub.kz سايتى حابارلايدى.