فينليانديا رەسەيمەن شەكاراداعى ۇزىندىعى 200 شاقىرىم بولاتىن قورشاۋ قۇرىلىسىن اياقتادى، دەپ حابارلايدى infohub.kz سايتى.
فينليانديانىڭ شەكارا كۇزەتى تىكەنەك سىممەن قورشالعان قورشاۋ قۇرىلىسىنىڭ اياقتالعانىن مالىمدەدى. فينليانديانىڭ ىشكى ىستەر ءمينيسترى ماري رانتانەن: «مەملەكەتتىڭ باستى مىندەتى — ءوز ازاماتتارىنىڭ قاۋىپسىزدىگىن قامتاماسىز ەتۋ. شىعىس شەكاراداعى قورشاۋ — وسى بولجاۋعا كەلمەيتىن ۋاقىتتا شەكارا قاۋىپسىزدىگىنىڭ ءتيىمدى جۇيەسىنىڭ اجىراماس بولىگى»، — دەپ اتاپ ءوتتى.
ول سونداي-اق فينليانديا شەنگەن ايماعىنىڭ مۇشەسى رەتىندە وداقتىڭ سىرتقى شەكارالارىنىڭ قاۋىپسىزدىگىنە جاۋاپتى ەكەنىن ايتتى.
بيىكتىگى 4،5 مەترلىك قۇرىلىس تەحنيكالىق باقىلاۋ جۇيەسىمەن، جول جەلىسىمەن جانە ەنى 25 مەترلىك پروسەكالارمەن جابدىقتالعان.
فينليانديا بيلىگى رەسەيمەن شەكارادا قورشاۋ سالۋ جوسپارىن العاش رەت 2022 جىلدىڭ قىركۇيەگىندە جاريالاپ، ۇزىندىعى 130-دان 260 شاقىرىمعا دەيىن بولاتىنىن بولجاعان بولاتىن. 2023 جىلدىڭ اقپانىندا جەر جۇمىستارى باستالدى: بولاشاق قورشاۋ ايماعىندا شەكارا وتكەلىنىڭ ەكى جاعىنداعى اعاشتاردى تامىرىمەن قوپارىپ، سىناق ءۇشىن ءۇش شاقىرىمدىق بولىك سالۋ جوسپارلانعان ەدى.
سول جىلدىڭ قاراشاسىندا فينليانديا رەسەيمەن شەكاراداعى بارلىق وتكىزۋ پۋنكتتەرىن جاۋىپ تاستادى، ەڭ سولتۇستىكتەگى «رايا-يووسەپپيدەن» باسقاسىن. وسىلايشا، ءبىر اپتا ىشىندە ۇزىندىعى 1500 شاقىرىمعا جۋىق شەكارا تولىعىمەن دەرلىك جابىلىپ، مۋرمانسكىدەن ءۇش ساعاتتىق جەردەگى ەلسىز تۋندراداعى پۋنكت قانا قالدى، دەپ جازدى ءبي-بي-سيدىڭ ورىس قىزمەتى.
2024 جىلدىڭ شىلدەسىندە قورشاۋ سالۋ ءۇشىن شامامەن 120 شاقىرىم ورمان كەسىلەتىنى حابارلانعان بولاتىن، جۇمىستار سول جازدا باستالدى.