گەرمانيانىڭ بۇرىنعى سىرتقى ىستەر ءمينيسترى يوشكا فيشەر ەۋروپا مەملەكەتتەرى مەن امەريكا قۇراما شتاتتارى اراسىنداعى قايشىلىقتار تەرەڭدەي تۇسكەن جاعدايدا سولتۇستىك اتلانتيكالىق اليانستىڭ بۇگىنگى قالپىندا ساقتالىپ قالۋى ەكىتالاي دەپ كۇمان ءبىلدىردى. ول بۇل تۋرالى نەمىس باسىلىمى Die Zeit جاريالاعان سۇحباتىندا ايتتى، دەپ حابارلايدى infohub.kz سايتى.
فيشەردىڭ ايتۋىنشا، ەۋروپا مەن اقش اراسىنداعى الشاقتىق ناتو-نىڭ ىدىراۋىنا اكەلۋى مۇمكىن. «بىرگە بولساق، كۇشتىمىز، ءبىراق „ترامپيستەرمەن“ ورتاق نورماتيۆتىك نەگىزىمىز جوق، مۇنى مويىنداۋ قيىن بولسا دا. ناتو امان قالادى دەپ ويلامايمىن»، — دەدى ول.
گەرمانيانىڭ سىرتقى ساياسات ۆەدومستۆوسىنىڭ ەكس-باسشىسى ترانساتلانتيكالىق قاتىناستاردى ساقتاپ قالۋ ءۇشىن ءوزارا ءىس-قيمىلدىڭ جاڭا نەگىزىن قالىپتاستىرۋ قاجەت ەكەنىن اتاپ ءوتتى. ونىڭ پىكىرىنشە، بۇل ۇدەرىستە شەشۋشى ءرولدى ەۋروپانىڭ ءوزى ساياسي جانە اسكەري مۇمكىندىكتەرىن نىعايتۋ ارقىلى اتقارۋى ءتيىس.
فيشەر سونداي-اق اقش-تىڭ ناتو-نىڭ ەۋروپالىق بولىگىندەگى ۇستەمدىك كەزەڭى اياقتالعانىن، ايماق ەلدەرى ءوز قاۋىپسىزدىگىن دەربەس قامتاماسىز ەتە الاتىنداي بولۋى كەرەكتىگىن اتاپ ءوتتى.
بۇعان دەيىن ناتو باس حاتشىسى مارك ريۋتتە اليانستىڭ ۇيىم باسشىلىعىندا ەۋروپالىق ەلدەردىڭ ءرولىن كۇشەيتۋ باعىتىندا جالعاسىپ كەلە جاتقانىن مالىمدەگەن. ونىڭ ايتۋىنشا، ەۋروپادا قاۋىپسىزدىكتى قامتاماسىز ەتۋگە دەگەن كوزقاراس وزگەرىپ جاتىر.