فلوريدادا ءولىم جازاسىنا كەسىلگەن 72 جاستاعى دەنيەل كوناحاننىڭ ادۆوكاتتارى اقش جوعارعى سوتىنا ونىڭ ءولىم جازاسىن ورىنداۋدى توقتاتۋ تۋرالى ءوتىنىش جولدادى. بۇل تۋرالى infohub.kz سايتى حابارلايدى.
كوناحان 1996 جىلى ريچارد مونتگومەريدى ۇرلاپ، ولتىرگەنى ءۇشىن ءولىم جازاسىنا كەسىلگەن ەدى. ونىڭ ءمايىتى فلوريدا شتاتىنىڭ شارلوتت وكرۋگىندەگى ورماندى القاپتان تابىلعان. قۇقىق قورعاۋ ورگاندارىنىڭ مالىمەتىنشە، كوناحان مونتگومەريدى جالاڭاش سۋرەتكە ءتۇسىرۋ ءۇشىن اقى تولەپ، سودان كەيىن ونى ولتىرگەن. سونداي-اق ول 1990 جىلدارى فلوريدانىڭ وڭتۇستىك-باتىسىندا وسىعان ۇقساس بىرنەشە كىسى ولتىرۋگە قاتىسى بار دەپ كۇدىكتەنەدى.
كوناحان مونتگومەريدىڭ ولىمىنە قاتىسى جوق ەكەنىن بىرنەشە رەت مالىمدەگەن. ادۆوكاتتارى ونىڭ 2025 جىلدىڭ ناۋرىز ايىنان بەرى وقيعا ورنىنان جانە مونتگومەريدىڭ دەنەسىنەن الىنعان دالەلدەمەلەرگە دنق ساراپتاماسىن جۇرگىزۋدى تالاپ ەتىپ كەلگەنىن ايتادى. ولاردىڭ پىكىرىنشە، بۇل ساراپتاما ونىڭ كىناسىزدىگىن دالەلدەي الادى.
فلوريدا گۋبەرناتورى رون دەسانتيس كوناحاننىڭ دنق ساراپتاماسىنا قاتىستى ءوتىنىشى قارالىپ جاتقان كەزدە، ياعني 11 تامىزدا ونىڭ ءولىم جازاسىنا قاتىستى وردەرگە قول قويعان. ال وردەرگە قول قويىلعاننان كەيىن 24 ساعات ىشىندە شتاتتىق سوت كوناحاننىڭ دنق ساراپتاماسى تۋرالى ءوتىنىشىن قابىلداماعان.
ادۆوكاتتاردىڭ وتىنىشىندە: "كوناحان مىرزا ءوزىن كىناسىز دەپ تانۋدى سۇرامايدى، ول تۇرمەدەن بوساتۋدى دا سۇرامايدى. ول تەك ءولىم جازاسىن ورىنداۋدى توقتاتىپ، ونىڭ نەگىزدى تالاپتارىن قاراۋدى سۇرايدى"، — دەلىنگەن.
ايتا كەتەيىك، بيىل فلوريدا شتاتىندا 14 ادام ءولىم جازاسىنا كەسىلگەن.