قازاقستاندىقتار الەۋمەتتىك جەلىدە Fly Arystan لوۋكوستەرىنىڭ جولاۋشىلارى قول جۇگىنىڭ جوق ارتىق سالماعى ءۇشىن اقى تولەۋ تالاپ ەتىلگەنى تۋرالى جازبانى تالقىلاپ جاتىر. بۇل تۋرالى infohub.kz سايتى حابارلايدى.
jakentus اتتى قولدانۋشى Threads جەلىسىندە استانا اۋەجايىندا بولعان جاعداي تۋرالى جازبا جاريالادى. ونىڭ ايتۋىنشا، ۇشۋ الدىندا ولار قول جۇگىن ءوز تارازىلارىندا ولشەپ كورگەن – ناتيجە 7،1 كگ كورسەتكەن. الايدا ترانزيت ايماعىنان ءوتىپ، ۇشاققا وتىرار الدىندا Fly Arystan قىزمەتكەرلەرى سول جۇكتى ءوز تارازىلارىندا ولشەپ، 12 كگ دەپ كورسەتكەن. جولاۋشىعا 11 مىڭ تەڭگە تولەۋ ۇسىنىلعان. ول تارازىنى اۋىستىرۋدى سۇراعاندا، باسقا تارازى 7،1 كگ كورسەتكەن.
«بۇگىن ءبىز استانا اۋەجايىندا قول جۇگىن قىزىق ءۇشىن ولشەدىك. تارازى 7،1 كگ كورسەتتى. ترانزيت ايماعىنا ءوتىپ، Fly Arystan ۇشاعىنا وتىرار الدىندا قىزمەتكەرلەر جولاۋشىلاردىڭ قول جۇگىن ولشەي باستادى. تاڭقالارلىعى، ءبىزدىڭ قول جۇگى Fly Arystan تارازىسىندا 12 كگ بولىپ شىقتى. بىزگە 11 مىڭ تەڭگە تولەۋ كەرەك دەدى. ءبىز تارازىنى اۋىستىرۋدى سۇرادىق، باسقا تارازى 7،1 كگ كورسەتتى. بۇل نە دەگەنىمىز؟ بۇل تارازىنىڭ اقاۋى دەپ ۇمىتتەنەمىن»، — دەپ جازدى قازاقستاندىق.
Fly Arystan اۋەكومپانياسى بۇل جازباعا جاۋاپ بەردى. ولاردىڭ تۇسىندىرۋىنشە، ىشكى تەكسەرۋ ناتيجەسىندە قاقپاداعى تارازىنىڭ جارامدى كاليبرلەۋ سەرتيفيكاتى بار ەكەنى انىقتالعان. قازىرگى ۋاقىتتا جابدىق تەحنيكالىق تەكسەرۋگە جىبەرىلىپ، ۋاقىتشا پايدالانۋدان الىنعان. اۋەكومپانيا تۇسىنىستىك تانىتقانى ءۇشىن العىس ءبىلدىردى.