flydubai رەيسىنىڭ كاپيتانىنا شابۋىل جاساعان ەكىنشى ۇشقىش تەرگەۋ بارىسىندا ۇشاقتى بەن-گۋريون اۋەجايىنىڭ تەرمينالىنا باعىتتاۋدى كوزدەگەنىن مويىندادى. بۇل تۋرالى ءيزرايلدىڭ «12 ارناسى» ءجۋرناليسى اميت سەگال مالىمدەدى، دەپ حابارلايدى infohub.kz سايتى.
ءجۋرناليستىڭ ايتۋىنشا، وماندىق ۇشقىش ادەتتەگىدەي قونۋعا كىرىسۋدى جوسپارلاعان، الايدا سوڭعى سەكۋندتاردا ۇشاقتى كەنەت تەرمينال عيماراتىنا باعىتتاماق بولعان. ول سول ساتتە اۋە كەمەسىن تۇتقىنداۋ مۇمكىن بولمايدى دەپ ەسەپتەگەن.
ءدال وسى سەبەپتى، سەگالدىڭ تۇجىرىمىنشا، شابۋىلداۋشى كاپيتانعا تەك يوردانيا اۋماعىنىڭ ۇستىندە، لاينەر يزرايلگە جاقىنداعان كەزدە شابۋىل جاساعان.
ءجۋرناليستىڭ دەرەگىنشە، بۇل ويدى جۇزەگە اسىرۋعا جارالانعان ءۇندىستاندىق كاپيتاننىڭ قانداي جاعدايدا بولسا دا ۇشقىشتار كابيناسىنىڭ ەسىگىن اشۋعا بەل بايلاۋى كەدەرگى بولعان.
ەسكە سالايىق، 30 قىركۇيەكتە دۋبايدان تەل-اۆيۆكە ۇشقان flydubai FZ1073 رەيسىندە ەكىنشى ۇشقىش كاپيتانعا شابۋىل جاساپ، ۇشاقتى باسقارۋدى ءوز قولىنا الۋعا تىرىسقان. بورتتا 170-تەن استام جولاۋشى مەن ەكيپاج مۇشەلەرى بولعان.
جولاۋشىلار مەن ەكيپاج مۇشەلەرى شابۋىلداۋشىنى زالالسىزداندىردى. بورتتا بولعان رەزەرۆتىك ۇشقىش ۇشاقتى ساۋد ارابياسىنىڭ سولتۇستىك-باتىسىنداعى تابۋك اۋەجايىنا قوندىردى. ەكىنشى ۇشقىشتى ساۋد بيلىگى ۇستاپ، كەيىن بىرىككەن اراب امىرلىكتەرىنە تاپسىردى.
بۇعان دەيىن «كۋرسيۆ» وقيعادان كەيىن flydubai دۋباي مەن يزرايل اراسىنداعى بارلىق رەيستەردى ۋاقىتشا توقتاتقانىن جازعان. اۋەكومپانيا تەرگەۋ قورىتىندىسى بويىنشا قوسىمشا اقپارات العاننان كەيىن ۇشۋلاردى قايتا باستايتىنىن مالىمدەدى.