Flydubai اۋەكومپانياسى ساۋد ارابياسىندا شۇعىل قونعان رەيسكە قاتىستى تەرگەۋ اياقتالعانشا يزرايلگە جانە كەرى باعىتتاعى رەيستەرىن توقتاتتى. بۇل تۋرالى تاسىمالداۋشى رەسمي مالىمدەمە جاسادى، دەپ حابارلايدى infohub.kz سايتى.
«30 قىركۇيەكتە بولعان FZ 1073 رەيسىندەگى وقيعادان كەيىن ءتيىستى ورگاندارمەن كەلىسە وتىرىپ، Flydubai تەرگەۋ جۇرگىزىلىپ جاتقان كەزەڭدە يزرايلگە جانە يزرايلدەن رەيستەردى توقتاتادى»، — دەلىنگەن اۋەكومپانيانىڭ مالىمدەمەسىندە.
تاسىمالداۋشىنىڭ پىكىرىنشە، توقتاتۋ ءتيىستى ورگاندارعا جۇمىسىن جالعاستىرىپ، بولعان وقيعانىڭ بارلىق ءمان-جايىن انىقتاۋعا مۇمكىندىك بەرەدى.
«ءبىز قازىرگى تەرگەۋگە جان-جاقتى كومەك كورسەتۋگە جانە بارلىق باعىتتارىمىزدا قاۋىپسىزدىكتىڭ ەڭ جوعارى ستاندارتتارىن ساقتاۋعا تولىق دايىنبىز. مەملەكەتتىك ورگاندارمەن، رەتتەۋشى قۇرىلىمدارمەن جانە اۋەجاي وكىلدەرىمەن تىعىز بايلانىستامىز. جاڭا اقپارات تۇسكەن سايىن ۇشۋلاردى توقتاتۋ تۋرالى شەشىمدى قايتا قارايمىز»، — دەلىنگەن مالىمدەمەدە.
ەسكە سالايىق، يزرايل اسكەري-اۋە كۇشتەرىنىڭ يسترەبيتەلدەرى ۇشاققا قاراي كوتەرىلگەن بولاتىن. كەيىن اۋە كەمەسى ساۋد ارابياسىنا قونعانى بەلگىلى بولدى. سودان سوڭ Flydubai يزرايلدىك تەلەارناعا دۋباي — تەل-اۆيۆ رەيسىندە ۇشقىشتار اراسىندا ۇشاق بورتىندا توبەلەس بولعانىن حابارلادى.
كوپ ۇزاماي ۇشاقتان العاشقى فوتو مەن بەينەجازبالار پايدا بولدى. سۋرەتتە شابۋىلداۋشىمەن كۇرەسكەن، بولجام بويىنشا، جولاۋشى بەينەلەنگەن. ال بيلىك ۇشقىشتاردىڭ ءبىرى ۇشاقتى ادەيى قۇلاتپاق بولعان دەگەن نۇسقانى تەكسەرۋدە. ونىڭ ارەكەتىن ەكىنشى ۇشقىش پەن ونىمەن كۇرەسكە ءتۇسىپ، اپاتتىڭ الدىن العان يزرايلدىك جولاۋشىلار توقتاتقان دەپ بولجانادى.
سونداي-اق ۇشقىشتاردىڭ ازاماتتىعى تۋرالى تاعى ءبىر نۇسقا ايتىلدى. رەسەي مەن ۋكراينا ازاماتتىعى تۋرالى نۇسقادان كەيىن ۇشقىشتاردىڭ ومان مەن ءباا ازاماتتىعى بار دەگەن دەرەكتەر شىقتى.
ودان ءارى ۇشقىشتاردىڭ ءبىرى شابۋىلدان كەيىن پىشاق جاراقاتىنان كوز جۇمۋى مۇمكىن دەگەن اقپارات پايدا بولدى.
ب ا ق سونداي-اق ۋكراينا مەن رەسەيدەن كەلگەن ۇشقىشتار جولاۋشى رەتىندە ۇشىپ، FlyDubai ۇشاعىنىڭ باسقارۋىن قولعا العانىن جازدى.
كەيىنىرەك FlyDubai ۇشاعىنىڭ بورتىندا ارىپتەسىنىڭ شابۋىلىنان زارداپ شەككەن ۇشقىش ءۇندىستان ازاماتى سميت ماچچحار بولعانى بەلگىلى بولدى.