دۋبايدان تەل-اۆيۆكە ۇشىپ بارا جاتقان FlyDubai اۋەكومپانياسىنىڭ ۇشاعىندا جولاۋشى رەتىندە وتىرعان ەكى ۇشقىش — رەسەي مەن ۋكراينا ازاماتتارى — ءقاۋىپ سيگنالى بەرىلگەن سوڭ اۋە كەمەسىن باسقارۋدى ءوز قولدارىنا الىپ، اپاتتان امان ساقتاپ قالدى. بۇل تۋرالى infohub.kz سايتى حابارلايدى.
ساۋد ارابياسىنداعى تابۋك اۋەجايىنىڭ اكىمشىلىگى قونعاننان كەيىن قۇتقارۋشىلار رەيستىڭ زارداپ شەككەن ەكى ۇشقىشىن جەرگىلىكتى اۋرۋحاناعا جەتكىزگەنىن راستادى. اۋەدە لاينەردى باسقارۋدى قىزمەت باسىندا بولماعان ەكى ەكيپاج مۇشەسى — رەسەيلىك جانە ۋكراينالىق ۇشقىشتار — قولعا الدى. ولار جولاۋشى رەتىندە ۇشىپ كەلە جاتقان، الايدا ءقاۋىپتى جويىپ، ۇشاقتىڭ ساۋد ارابياسىنا ءقاۋىپسىز قونۋىن قامتاماسىز ەتە الدى.
يزرايل كولىك ءمينيسترى ميري رەگيەۆ ەلدىڭ اۆياسيالىق بيلىگىنە Flydubai كومپانياسىنىڭ يزرايلگە بارلىق رەيسىن توقتاتا تۇرۋدى تاپسىردى. ول سونداي-اق FlyDubai كومپانياسى يزرايل مەن ءباا اراسىنداعى اۆياسيا سالاسىنداعى كەلىسىمدەردى بۇزعانىن تەكسەرۋ قاجەتتىگىن مالىمدەدى. ول كەلىسىمدەر بويىنشا ۇشاق ەكيپاجدارى يزرايلمەن رەسمي ديپلوماتيالىق قاتىناستاعى ەلدەردىڭ پاسپورتتارىن يەلەنۋى ءتيىس.
تەرگەۋ ەكىنشى ۇشقىشتىڭ ومان ازاماتتىعى بولۋىنا — يزرايلمەن ديپلوماتيالىق قاتىناسى جوق ەلگە — باسا نازار اۋدارادى.
يزرايل اسكەري-اۋە كۇشتەرىنىڭ يسترەبيتەلدەرى ۇشاققا قاراي كوتەرىلدى. كەيىن اۋە كەمەسىنىڭ ساۋد ارابياسىنا قونعانى بەلگىلى بولدى. سودان سوڭ Flydubai كومپانياسى يزرايلدىك تەلەارناعا دۋباي — تەل-اۆيۆ رەيسىندە ۇشقىشتار اراسىندا توبەلەس بولعانىن حابارلادى.
كوپ ۇزاماي ۇشاقتان العاشقى فوتو مەن ۆيدەو پايدا بولدى. سۋرەتتە شابۋىلداۋشىمەن كۇرەسكەنى بولجامدالعان جولاۋشى بەينەلەنگەن. بيلىك ۇشقىشتاردىڭ ءبىرى ۇشاقتى ادەيى قۇلاتپاق بولعان دەگەن نۇسقانى تەكسەرۋدە. ونىڭ ارەكەتىن ەكىنشى ۇشقىش پەن ونىمەن كۇرەسكە تۇسكەن يزرايلدىك جولاۋشىلار توقتاتىپ، اپاتتىڭ الدىن الدى دەپ بولجانادى.
سونداي-اق ۇشاق ۇشقىشتارىنىڭ ازاماتتىعى تۋرالى تاعى ءبىر نۇسقا ايتىلدى. رەسەي مەن ۋكراينا ازاماتتىعى تۋرالى نۇسقادان كەيىن ۇشقىشتاردىڭ ومان مەن ءباا ازاماتتىعى بار دەگەن دەرەكتەر شىقتى.
ودان ءارى ۇشقىشتاردىڭ ءبىرى شابۋىلدان كەيىن پىشاق جاراقاتىنان كوز جۇمۋى مۇمكىن دەگەن اقپارات تارادى.