Forbes جۋرنالىنىڭ باس رەداكتورى رەندالل لەين وتكەن ايدا قىزمەتىنەن كەتكەن ەدى. ونىڭ بيزنەس-سەرىكتەسىنەن $6 ملن قابىلداعانى ءۇشىن جۇمىستان شىعارىلعانى حابارلاندى. بۇل تۋرالى New York Times گازەتى جازدى، دەپ حابارلايدى infohub.kz سايتى.
New York Timesء-تىڭ حابارلاۋىنشا، لەينگە اقشانى Shook Research كومپانياسىنىڭ نەگىزىن قالاۋشى RJ Shook تولەگەن. بۇل كومپانيا 2016 جىلدان بەرى Forbes-پەن بىرلەسىپ، بايلىق كەڭەسشىلەرىنىڭ رەيتينگىن جاريالاپ كەلەدى. تولەم Shook كومپانياسىنىڭ باقىلاۋ پاكەتىن جەكە مەنشىك كاپيتال فيرماسىنا ساتقاننان كەيىن ءبىر جىل وتكەن سوڭ جاسالعان.
Associated Press اگەنتتىگىنىڭ قاراۋىنا ىلىككەن 23 شىلدەدەگى ىشكى ەلەكتروندىق حاتتا لەيننىڭ كومپانيادا ەندى جۇمىس ىستەمەيتىنى راستالعان. وندا ونىڭ كەتۋ سەبەبى تۋرالى ەشقانداي مالىمەت جوق. لەين Forbes-تە 16 جىلعا جۋىق جۇمىس ىستەپ، 2017 جىلدان بەرى باس رەداكتور قىزمەتىن اتقارعان.
ماسەلەنىڭ سەزىمتالدىعىنا بايلانىستى اتىن اتاماۋدى وتىنگەن Forbes قىزمەتكەرى AP-گە جۇمىستان شىعارۋدىڭ ناقتى سەبەبىن قىزمەتكەرلەر Times ماقالاسىنان بىلگەنىن ايتقان. كەيىن تاراتىلعان حاتتا كومپانيا بۇل ماسەلەگە قاتىستى تۇسىنىكتەمە بەرە المايتىنىن مالىمدەگەن.
Times گازەتى لەيننىڭ ويىن بىلەتىن ادامعا سىلتەمە جاساپ، ول تولەمدى جىلدار بويى Shook-قا بەرگەن كەڭەستەرى ءۇشىن سىيلىق دەپ ساناعانىن جازعان. لەين Times-كە بەرگەن مالىمدەمەسىندە: "مەن قاتەلىك جىبەردىم جانە ول ءۇشىن جاۋاپكەرشىلىكتى ءوز موينىما الامىن. مەن سىيلىقتى جاريا ەتۋىم كەرەك ەدى، ال ونى جاساماۋىم — ۇلكەن قاتەلىك. مەن بۇعان قاتتى وكىنەمىن جانە وسىعان بايلانىستى سۇيىكتى جۇمىسىم مەن كوماندامنان ايىرىلدىم"، — دەگەن.
لەين مەن Forbes وكىلى APء-تىڭ سۇراقتارىنا جاۋاپ بەرمەدى. Shook-تىڭ لەينگە نە ءۇشىن اقشا تولەگەنى بەلگىسىز. الايدا كومپانيا مەن Forbes اراسىندا تىعىز بايلانىس بولعان سياقتى. مىسالى، Shook Research ءوز سايتىندا Forbes-پەن بىرلەسىپ جاساعان بايلىق كەڭەسشىلەرى مەن باسقارۋ توپتارىنىڭ 12 رەيتينگىن كورسەتەدى.
Forbesء-تىڭ رەداكسيالىق قۇندىلىقتار مەن ستاندارتتار تۋرالى مالىمدەمەسىندە كومپانيا "بارلىق قىزمەتكەرلەر مەن اۆتورلارعا ولاردىڭ ماتەريالدارىندا كورسەتىلگەن ادامداردان، كومپانيالاردان نەمەسە توپتاردان كەز كەلگەن نىسانداعى اقى، ارتىقشىلىق نەمەسە قىزمەت قابىلداۋعا تىيىم سالادى" دەلىنگەن.
Timesء-تىڭ بۇل حابارى باق-قا دەگەن قوعامدىق سەنىم تومەندەگەن كەزەڭدە جارىق كوردى. Pew Research Centerء-دىڭ اقپان ايىنداعى زەرتتەۋىنە سايكەس، امەريكاندىقتاردىڭ كوپشىلىگى (57%) جۋرناليستەردىڭ قوعام مۇددەسىنە ساي ارەكەت ەتەتىنىنە سەنىمدەرى تومەن ەكەنىن ايتقان.
Forbes 1917 جىلى قۇرىلىپ، كورپوراتيۆتىك امەريكا تۋرالى ىقپالدى ەكى اپتالىق باسىلىمعا اينالدى. ونىڭ مۇقاباسىندا ستيۆ دجوبس پەن ۋوررەن باففەت سياقتى اتاقتى تۇلعالار بەينەلەنگەن.