Forbes Kazakhstan رەيتينگىنە ەنگەن قازاقستاندىق ءىرى كاسىپكەرلەردىڭ جيىنتىق بايلىعى 15 جىلدا $37 ملرد-قا ارتىپ، $60،8 ملرد-قا جەتتى. Forbes مالىمەتىنشە، وسى جىلدار ىشىندە كاپيتالى ەڭ كوپ وسكەندەر — ۆياچەسلاۆ كيم، كۋليباەۆتار جۇبى جانە بولات وتەمۇراتوۆ، دەپ حابارلايدى infohub.kz سايتى.
Forbes Kazakhstan ءوز رەيتينگىنىڭ 15 جىلدىعىنا وراي ەلدەگى ەڭ باي كاسىپكەرلەر ءتىزىمىنىڭ وسى ۋاقىت ىشىندە قالاي وزگەرگەنىن تالدادى. 2012 جىلدان 2026 جىلعا دەيىن ولاردىڭ جيىنتىق بايلىعى 2،5 ەسەگە — $23،93 ملرد-تان $60،84 ملرد-قا دەيىن ءوستى.
ءوسىم رەيتينگتىڭ ءوزى 50-دەن 75 قاتىسۋشىعا دەيىن كەڭەيۋىمەن قاتار، ءىرى كومپانيالاردىڭ ليستينگكە شىعۋى جانە مەنشىك قۇرىلىمىنىڭ جاريالانۋى بارىسىندا ولار تۋرالى دەرەكتەردىڭ بىرتىندەپ اشىلۋىمەن تۇسىندىرىلەدى. سەرپىن تۇرعىسىنان 2021 جىل رەكوردتىق بولدى: سول جىلى رەيتينگ قاتىسۋشىلارىنىڭ بايلىعى بىردەن 50%-عا — $37،7 ملرد-قا دەيىن ءوستى. مۇنداي سەكىرىس نەگىزىنەن ءىرى قارجى-تەحنولوگيالىق اكتيۆتەردىڭ بيرجالىق اشىق باعاسىنىڭ ارقاسىندا بولدى.
رەيتينگ ءومىر سۇرگەن ۋاقىت بويى وعان 131 كاسىپكەر ەنگەن. ولاردىڭ تەك 20-سى عانا 15 جىل بويى تىزىمدە قالدى. رەيتينگتەگى ميللياردەرلەر سانى بەستەن توعىزعا، ال ولاردىڭ جيىنتىق بايلىعى $12،3 ملرد-تان $39،2 ملرد-قا دەيىن ءوستى.
وسى جىلدار ىشىندە كاپيتالى ەڭ كوپ وسكەندەر: ۆياچەسلاۆ كيم — $7،6 ملرد قوسىلدى، دينارا مەن تيمۋر كۋليباەۆتار — ءارقايسىسىنا $4،1 ملرد، سونداي-اق بولات وتەمۇراتوۆ — $3،8 ملرد قوسىلدى.
سونىمەن قاتار قازاقستاندىق ميللياردەرلەر مەن ميلليونەرلەر اراسىندا كاپيتالدىڭ شوعىرلانۋى جوعارى. رەيتينگتىڭ 75 قاتىسۋشىسىنىڭ العاشقى وندىعى جيىنتىق بايلىقتىڭ 66%-ىن، العاشقى بەستىگى 49،1%-ىن قۇرايدى.
ەسكە سالايىق، مامىر ايىندا Forbes Kazakhstan 2026 جىلعا ارنالعان ەڭ باي قازاقستاندىقتار رەيتينگىن جاڭارتقان بولاتىن.