قازاقستاندىق ForteBank 2025 جىلدىڭ قورىتىندىسى بويىنشا باسقارما مۇشەلەرىنە تولەنگەن سىياقىنىڭ جالپى كولەمىن ەكى ەسەدەن استامعا قىسقارتتى. توپ-مەنەدجمەنتكە تولەمدەردىڭ كۇرت تومەندەۋى ەلدىڭ قارجى نارىعىنداعى ءىرى M&A مامىلەلەرىنىڭ ءبىرى — Home Credit Bank ساتىپ الۋمەن تۇسپا-تۇس كەلدى، دەپ حابارلايدى infohub.kz سايتى.
قازاقستان قور بيرجاسىندا (KASE) جاريالانعان قۇجاتقا سايكەس، بانكتىڭ اتقارۋشى ورگانى مۇشەلەرىنە 2025 جىلى تولەنگەن جيىنتىق تولەم 1،86 ملرد تەڭگەنى قۇرادى. بۇل سوماعا لاۋازىمدىق جالاقىلار، سونداي-اق باسقارما قۇرامىندا بولعان كەزەڭدە توپ-مەنەدجەرلەرگە اقشالاي تۇردە تولەنگەن بارلىق كوتەرمەلەۋ تۇرلەرى كىرەدى.
2025 جىلعى كورسەتكىش الدىڭعى ەسەپتى كەزەڭمەن سالىستىرعاندا 2،12 ملرد تەڭگەگە (نەمەسە 53%-عا) از بولدى. 2024 جىلدىڭ قورىتىندىسى بويىنشا باسشىلىققا تولەنگەن جالپى سىياقى 3،97 ملرد تەڭگەگە جەتكەن ەدى.
قارجىلىق ەسەپتىلىك بويىنشا اۋديتورلىق ەسەپكە سايكەس، 2025 جىلدىڭ سوڭىندا ForteBank باسقارماسىنىڭ قۇرامىنا سەگىز ادام كىردى: تالعات قۋانىشيەۆ (باسقارما ءتوراعاسى)؛ راۆشان يرماتوۆ (ءتوراعانىڭ ورىنباسارى، قارجى ديرەكتورى)؛ الما ءابىلجانوۆا (كورپوراتيۆتىك بيزنەس بويىنشا باسقارۋشى ديرەكتور)؛ انۋار بولعاۋوۆ (زاڭ ماسەلەلەرى بويىنشا باسقارۋشى ديرەكتور)؛ ناريمان جارقىنبايەۆ (بولشەك بيزنەس بويىنشا باسقارۋشى ديرەكتور)؛ سەرگەي كارتاشوۆ (اقپاراتتىق تەحنولوگيالار بويىنشا باسقارۋشى ديرەكتور)؛ اننا پيليپەنكو (وپەراسيالىق قىزمەت بويىنشا باسقارۋشى ديرەكتور)؛ ەرنار تاشەنوۆ (شاعىن جانە ورتا بيزنەس جانە فيليالدار جەلىسى بويىنشا باسقارۋشى ديرەكتور).
2026 جىلدىڭ قاڭتارىندا اتقارۋشى ورگاننىڭ قۇرامى وزگەردى، ەرنار تاشەنوۆ پەن ناريمان جارقىنباەۆتىڭ وكىلەتتىكتەرى رەسمي تۇردە توقتاتىلدى. سالىستىرۋ ءۇشىن، 2024 جىلعى 31 جەلتوقسانداعى جاعداي بويىنشا بانك باسقارماسى التى ادامنان تۇردى (تالعات قۋانىشيەۆ، راۆشان يرماتوۆ، امىرحان چيكانايەۆ، استان ساگيتوۆ، گاۋحار بيسەمبيەۆا، ايدىن اۋەزقانوۆ). بۇعان قوسا، 2024 جىلعى 31 قازانعا دەيىن قارجى ينستيتۋتىن بەكجان ءپىرماتوۆ باسقاردى، كەيىن ونى ءتوراعا لاۋازىمىندا تالعات قۋانىشيەۆ الماستىردى (ول 6 جەلتوقساندا رەسمي تۇردە قىزمەتىنە كىرىستى).
بانك توپ-مەنەدجمەنتىنە بونۋستاردىڭ قىسقارۋى قارجى ينستيتۋتىنىڭ ەكسپانسياسى اياسىندا بولدى. 2026 جىلعى 23 ساۋىردە ForteBankء-تىڭ Home Credit Bank قارجى ينستيتۋتىن ساتىپ الۋ مامىلەسى اياقتالعانى حابارلاندى. باقىلاۋ پاكەتىن ساتىپ الۋ مامىلەسىنىڭ سوماسى 273 ملرد تەڭگەگە باعالاندى، بۇل ترانزاكسيانى قازاقستاننىڭ بانك سەكتورىنداعى سوڭعى جىلدارداعى ەڭ ءىرى بىرىگۋلەردىڭ بىرىنە اينالدىردى.
ForteBank اكتيۆتەرى بويىنشا قازاقستاندا بەسىنشى ورىندا جانە 25 جىلدان استام تاريحى بار. ول 2015 جىلى Forteء-دىڭ «اليانس بانك» جانە «تەمىربانك»-پەن بىرىگۋى ناتيجەسىندە قۇرىلعان. بانكتىڭ ماجوريتارلىق اكسيونەرى — بولات وتەمۇراتوۆ. 2025 جىلدىڭ قورىتىندىسى بويىنشا ForteBank اكتيۆتەرى 6،1 ترلن تەڭگەنى، مىندەتتەمەلەرى 5،33 ترلن تەڭگەنى، كاپيتالى 774،9 ملرد تەڭگەنى، تازا پايداسى 191 ملرد تەڭگەنى قۇرادى. 2026 جىلعى 1 شىلدەدەگى جاعداي بويىنشا بانكتىڭ پايداسى 68،9 ملرد تەڭگەنى قۇراپ وتىر.