فرانسيانىڭ سولتۇستىك-باتىسىنداعى تەڭىز سەنا دەپارتامەنتىندە جولاۋشىلار پويىزى رەلستەن شىعىپ، 44 ادام زارداپ شەكتى، ءبىر ادام اۋىر جاراقات الدى، دەپ حابارلايدى infohub.kz سايتى.
NUR.KZ اگەنتتىگى Anadolu-عا سىلتەمە جاساپ حابارلاعانداي، بۇل تۋرالى فرانسيا كولىك ءمينيسترى فيليپپ تابارو الەۋمەتتىك جەلىدەگى X پاراقشاسىندا مالىمدەدى. ۆەدومستۆو باسشىسى رۋان — كان باعىتىنداعى پويىز كلەون كوممۋناسىندا رەلستەن شىعىپ كەتكەنىن ايتتى.
تابارونىڭ ايتۋىنشا، زارداپ شەككەندەر مەن پويىز جولاۋشىلارىنا كومەك كورسەتۋ ءۇشىن وقيعا ورنىنا 140 ءورت ءسوندىرۋشى جىبەرىلگەن. پويىزدا بارلىعى 180 جولاۋشى بولعان.
مينيستر احۋالدى مۇقيات قاداعالاپ وتىرعانىن اتاپ ءوتتى، الايدا وقيعانىڭ سەبەپتەرىن حابارلامادى.
فرانسۋز بۇقارالىق اقپارات قۇرالدارى حابارلاعانداي، پويىزدىڭ رەلستەن شىعۋىنا قاتىستى تەرگەۋ باستالدى. رۋان پروكۋراتۋراسىنىڭ دەرەگىنشە، وقيعا سالدارىنان 44 ادام زارداپ شەگىپ، بىرەۋىنىڭ جاعدايى اۋىر دەپ باعالانۋدا.