فرانسيانىڭ جوعارعى سوتى 15 جاسقا تولماعاندارعا الەۋمەتتىك جەلىگە قول جەتكىزۋگە تىيىم سالۋدى جوققا شىعاردى، بۇل ءسوز بوستاندىعى مەن جەكە ومىرگە قول سۇعۋ دەپ تانىلدى. بۇل شەشىم پرەزيدەنت ەممانۋەل ماكرونعا سوققى بولدى، ويتكەنى الەمدە اۆستراليالىق ۇلگىدەگى شەكتەۋلەردى ەنگىزۋ ءۇردىسى كۇشەيىپ كەلەدى.
پارلامەنت شىلدە ايىندا ماقۇلداعان زاڭ 15 جاسقا تولماعاندارعا قىركۇيەك باسىنان باستاپ الەۋمەتتىك جەلىدە اككاۋنت اشۋعا تىيىم سالۋدى كوزدەگەن ەدى. سونىمەن قاتار، تەحنولوگيالىق پلاتفورمالار ءتورت اي ىشىندە بار اككاۋنتتاردى جابۋعا جانە فرانسيانىڭ جەكە ءومىردى قورعاۋ جونىندەگى رەتتەۋشىسى ماقۇلداعان جاس تەكسەرۋ قۇرالدارىن پايدالانۋعا مىندەتتى بولاتىن.
الايدا كونستيتۋسيالىق كەڭەس زاڭ جاس ەرەكشەلىگىن راستاۋدى تالاپ ەتكەنىمەن، مۇنىڭ «شارتتارى مەن شەكتەۋلەرىن» ناقتىلاماعانىن انىقتادى. سونداي-اق، شەكتەۋلەر ءسوز بوستاندىعى مەن جەكە ومىرگە قول سۇعاتىنىن اتاپ ءوتتى. كەڭەس ءوز شەشىمىندە «داۋلى ەرەجەلەر ءسوز بوستاندىعى مەن بايلانىس بوستاندىعىنا پروپورسيونالدى ەمەس تۇردە قول سۇعادى جانە جەكە ءومىردى قۇرمەتتەۋ قۇقىعىن قامتاماسىز ەتۋ ءۇشىن قاجەتتى قۇقىقتىق كەپىلدىكتەردى قامتاماسىز ەتپەيدى» دەپ مالىمدەدى.
بىرنەشە ەل اۆستراليانىڭ مىسالىنا ەردى، ول وتكەن جەلتوقساندا 16 جاسقا تولماعاندارعا ءىرى الەۋمەتتىك پلاتفورمالارعا تىيىم سالعان بولاتىن. يندونەزيا مەن مالايزيا كەيبىر پلاتفورمالاردا 16 جاسقا تولماعاندارعا شەكتەۋلەر ەنگىزدى، ال ۇلىبريتانيا كەلەسى جىلى سول جاستاعىلارعا جەتەكشى قوسىمشالاردى پايدالانۋعا تىيىم سالۋعا دايىندالۋدا.
اۆستراليادا شەكتەۋلەر Facebook، Instagram، Kick، Reddit، Snapchat، Threads، TikTok، Twitch، X جانە YouTube سياقتى پلاتفورمالارعا قاتىستى. ەۋرووداق تا سيفرلىق قىزمەتتەر تۋرالى زاڭعا سۇيەنە وتىرىپ، بالالاردى زياندى الەۋمەتتىك جەلى فۋنكسيالارىنان قورعاۋدى كۇشەيتۋدى جوسپارلاپ وتىر. ەۋروپالىق كوميسسيا پرەزيدەنتى ۋرسۋلا فون دەر ليايەن وتكەن ايدا «پلاتفورمالارعا جاس ەرەكشەلىگىنە ساي شەكتەۋلەر قاجەت ەكەنى انىق» دەدى. ول ناقتى جاس شەگىن اتاماي، «ءارتۇرلى جاس توپتارى ءۇشىن كەزەڭدىك جانە بىرتىندەپ قول جەتكىزۋ» مۇمكىندىگىن كوتەردى.
الەۋمەتتىك جەلى كومپانيالارى ادەتتە جالپى تىيىمدارعا قارسى، سەبەبى ولاردا 13 جاستان باستاپ پايدالانۋشىلاردى قورعاۋ شارالارى بار دەپ مالىمدەيدى. ولار سونداي-اق ۇكىمەت شەكتەۋلەرىنە باعىناتىندارىن ايتتى. ماكرون ءساۋىر ايىندا جاسوسپىرىمدەردى قۇرىلعىلارىن ءوشىرىپ، جاقسى ازامات بولۋ ءۇشىن كىتاپ وقۋعا شاقىرعان بولاتىن. ەليسەي سارايىنىڭ مالىمەتىنشە، ول پرەمەر-مينيستر سەباستەن لەكورنۋعا كونستيتۋسيالىق كەڭەستىڭ ەسكەرتۋلەرىن ەسكەرە وتىرىپ، زاڭنامانى قايتا قاراۋدى تاپسىرعان. ەليسەي ماكرون رەفورمانىڭ 2027 جىلدىڭ كوكتەمىندەگى پرەزيدەنتتىك سايلاۋعا دەيىن كۇشىنە ەنۋىنە بەل بايلاعانىن حابارلادى. ماكرون ءۇشىنشى مەرزىمگە سايلانۋعا قۇقىعى جوق.