فرانسيادا جۇما كۇنى 400 مەكتەپ جابىلدى. بيلiك نارازىلىقتى «قالالىق تارتىپسىزدىككە» اينالدى دەپ باعالاپ وتىر. بۇل تۋرالى فرانسيا ءبىلىم مينيسترلىگىنىڭ سوڭعى دەرەكتەرىنە سىلتەمە جاساپ infohub.kz سايتى حابارلايدى.
مينيسترلىكتىڭ مالىمەتىنشە، وسى اپتادا ورشىگەن وقۋشىلار نارازىلىعى بارىسىندا 100-گە جۋىق مەكتەپ اۋىر زارداپ شەكتى، 40 مەكتەپ ديرەكتورى جاراقات الدى.
وقۋشىلاردىڭ تالاپ-نارازىلىعى بىرنەشە سەبەپتەن تۋىنداعان: ساباق كەستەسىنىڭ تىم تىعىزدىعى، سىنىپتاردىڭ تولىپ كەتۋى، مۇعالىمدەردىڭ جەتىسپەۋى جانە بيىلعى جازداعى اپتاپ ىستىقتا سىنىپتارداعى توزگىسىز جاعداي. بارا-بارا قاقتىعىسقا اينالعان نارازىلىققا قارسى ءتارتىپ ساقشىلارى جۇمىلدىرىلدى.
ىشكى ىستەر مينيسترلىگىنىڭ حابارلاۋىنشا، نارازىلىق باستالعاننان بەرى 15 پەن 18 جاس ارالىعىنداعى 3 مىڭعا جۋىق ليسەي وقۋشىسى ۇستالدى، ونىڭ 1 949-ى تەك بەيسەنبى كۇنى ۇستالعان.
كەشە تۇندە جەرگىلىكتى پروكۋرورلارمەن سويلەسكەن ادىلەت ءمينيسترى جەرالد دارمانەن ولاردى ازاماتتىق جاۋاپكەرشىلىك تالاپتارىن قوزعاۋعا شاقىردى. بۇل ارقىلى بالالارى كەلتىرگەن زالال ءۇشىن اتا-انالار قارجىلاي جاۋاپتى بولادى.
ال ءبىلىم ءمينيسترى ەدۋارد جەففرە اتا-انالاردان كومەك سۇراپ، «بالالار كوشەدە قاۋىپتە» دەپ ەسكەرتتى.
الايدا شيەلەنىستىڭ باسىلۋ بەلگىسى جوق. العاشقى وقيعالار ستراسبۋرگتەگى جان-روستان ليسەيىنىڭ جانە مارسەلدەگى سيمون-ۆەي ليسەيىنىڭ ماڭىندا تىركەلدى. بۇگىن 400 مەكتەپ جابىق تۇر.
فرانسيانىڭ وڭتۇستىگىندەگى بۋش-ديۋ-رون پرەفەكتى جاك ۆيتكوۆسكي BFMTV تەلەارناسىنا بەرگەن سۇحباتىندا الاڭداعى جاعداي بەيسەنبىدەگى تارتىپسىزدىكتەرمەن «سالىستىرۋعا كەلمەيتىنىن»، بۇگىن نارازىلىققا «الدەقايدا از ادام» قاتىسقانىن ايتتى. ونىڭ سوزىنشە، ايماقتاعى 11 مەكتەپ زارداپ شەككەن، 55 مەكتەپ قاشىقتان وقۋعا كوشتى.
وسى اپتاداعى نارازىلىقتاردان كەلگەن شىعىن جۇزدەگەن ميلليون ەۋروعا جەتۋى مۇمكىن. وۆەرن-رونا-الپى ايماعى 25 ميلليون ەۋرو زالال كورگەنىن مالىمدەدى.