فرانسيادا جوعارى سىنىپ وقۋشىلارىنىڭ جاپپاي نارازىلىعى تارتىپسىزدىككە ۇلاستى: ەلدىڭ ىشكى ىستەر مينيسترلىگىنىڭ دەرەگىنشە، 625 ادام ۇستالدى، دەپ حابارلايدى infohub.kz سايتى.
ەكى اپتاعا جۋىق ۋاقىت بۇرىن باستالعان نارازىلىق شارالارى 356 وقۋ ورنىن قامتىدى. ءتۇرلى قالالاردا نارازىلىق بىلدىرۋشىلەر كولىكتەر مەن قوقىس كونتەينەرلەرىن ورتەپ، مەكتەپ عيماراتتارىن تالقاندادى. مۇعالىمدەرگە شابۋىل جاسالدى. پوليسەيلەرگە تاس پەن وتشاشۋ لاقتىرىلدى.
83 پوليسەي مەن جاندارم زارداپ شەكتى. ءبىلىم مينيسترلىگى 119 وقۋشى مەن مەكتەپ قىزمەتكەرىنىڭ زارداپ شەككەنىن حابارلايدى.
العاشىندا وقۋشىلار قارجىلاندىرۋدىڭ جەتىسپەۋشىلىگىنە، مۇعالىمدەر تاپشىلىعىنا جانە مەكتەپتەگى ءبىلىم بەرۋ جۇيەسىندەگى باسقا دا ماسەلەلەرگە قارسى شىققان، الايدا نارازىلىق تەز ارادا زورلىق-زومبىلىققا ۇلاستى.
فرانسيا پرەزيدەنتى ەممانۋەل ماكرون جاستاردىڭ الاڭداۋشىلىعى ابدەن زاڭدى ەكەنىن، ءبىراق پوليسەيلەرگە، مۇعالىمدەرگە جانە جۋرناليستەرگە قارسى زورلىق-زومبىلىقتى ەشنارسەمەن اقتاۋعا بولمايتىنىن مالىمدەدى. ول پوليسەيلەر تاراپىنان بولعان قۇقىقبۇزۋشىلىقتار دا زاڭ بويىنشا قۋدالانۋى ءتيىس ەكەنىن قوستى.
بۇعان دەيىن فرانسيانى جوعارى سىنىپ وقۋشىلارىنىڭ نارازىلىعى قامتىعانى حابارلانعان — ءبىر اپتا بويى وقۋشىلار وقۋ ورىندارىن بوگەپ جاتىر. الدىڭعى كۇنى 440 ادامنىڭ ۇستالعانى ايتىلعان.