فرانسيادا جوعارى سىنىپ وقۋشىلارىنىڭ نارازىلىق اكسيالارىنان كەلگەن شىعىن 33–38 ميلليون ەۋروعا باعالاندى، دەپ حابارلايدى infohub.kz سايتى.
ەلدىڭ ءۇش ءوڭىرى اكىمدىكتەرىنىڭ مالىمەتىنشە، نەگىزگى ماتەريالدىق زالال بىلاي ءبولىندى: وۆەرن — رونا — ءالپى وڭىرىندە 25–30 ميلليون ەۋرو، پاريج وڭىرىندە (يل-دە-فرانس) شامامەن 7 ميلليون ەۋرو، گراند-ەست وڭىرىندە 1 ميلليون ەۋروعا جۋىق.
فرانسيانىڭ ىشكى ىستەر ءمينيسترى لوران نۋنەس TF1 تەلەارناسىنىڭ ەفيرىندە اپتا باسىنان بەرى ەلدە 5 مىڭنان استام ادام ۇستالعانىن، ولاردىڭ 85%-ى كامەلەتكە تولماعاندار ەكەنىن مالىمدەدى.
ءورت قويۋ، ۇرلىق جانە ۆانداليزم وقيعالارى تىركەلگەن نارازىلىقتار 735 مەكتەپتى قامتىدى، ونىڭ ىشىندە 100-دەن استام ليسەي تالقاندالدى. بلوكتاۋ مەن قاقتىعىستارعا بايلانىستى 400-گە جۋىق وقۋ ورنى تولىعىمەن قاشىقتان وقىتۋ رەجيمىنە كوشۋگە ءماجبۇر بولدى.
فرانسيانىڭ يۋستيسيا ءمينيسترى دجەرالد دارمانين نارازىلىققا شىققان جاسوسپىرىمدەردىڭ اتا-انالارىن ازاماتتىق جاۋاپكەرشىلىككە تارتۋعا بۇيرىق بەردى. بۇل شارا ولاردى جوندەۋ جۇمىستارىن بىرلەسىپ تولەۋگە جانە وقۋ ورىندارىنا كەلتىرىلگەن شىعىندى تولىق وتەۋگە مىندەتتەيدى. ۇكىمەت بۇل قارجىلىق ءوندىرىپ الۋ شاراسىن جاسوسپىرىمدەردى باس بوستاندىعىنان ايىرۋدان گورى تيىمدىرەك دەپ سانايدى.
بۇعان دەيىن «كۋرسيۆ» فرانسيادا وقۋشىلاردىڭ جاپپاي نارازىلىعى ءبىلىم بەرۋ جۇيەسىنىڭ ناشارلاۋىنا، وقۋ جۇكتەمەسىنىڭ اۋىرلىعىنا، مۇعالىمدەردىڭ جەتىسپەۋىنە جانە سىنىپتاردىڭ تولىپ كەتۋىنە بايلانىستى باستالعانىن جازعان بولاتىن.