فرانسيا ىشكى ىستەر مينيسترلىگى قاساقانا نەمەسە كەزدەيسوق ءورت قويۋعا كۇدىكتى 400-دەن استام ادامنىڭ ۇستالعانىن حابارلادى، دەپ مالىمدەيدى infohub.kz سايتى.
ۆەدومستۆونىڭ دەرەگىنشە، 420 ادام قاماۋعا الىنعان، ونىڭ ىشىندە 166 كامەلەتكە تولماعان. ءبىر جاعدايدا، وتكەن ايدا ۆار دەپارتامەنتىنىڭ وڭتۇستىك-شىعىس بولىگىندە 23 جاستاعى ەر ادام بەس كۇن ىشىندە 10 عيماراتتى قاساقانا ورتەدى دەپ ايىپتالۋدا. كىناسى دالەلدەنسە، وعان 15 جىل باس بوستاندىعىنان ايىرۋ جانە 150 مىڭ ەۋرو ايىپپۇل سالىنۋى مۇمكىن.
تاعى دا كوپتەگەن ادام سوتتالىپ، دەرەۋ ۇكىم شىعارىلدى. مىسالى، ۆوگەزدەگى راون-ل'ەتاپ اۋدانىندا ءۇش ورماندى ورتەگەنى ءۇشىن ءبىر ەر ادام ءۇش جىلعا باس بوستاندىعىنان ايىرىلدى.
BBC جۋرناليستەرى سوت ىستەرىنىڭ شامادان تىس قاتال جانە ادىلەتسىز دەپ قابىلدانعانىن اتاپ وتەدى. ءۇيسىز ادام مەن اۋىر ءاۋتيزمى بار ادام تەمەكى تۇقىلىن تاستاعانى ءۇشىن تۇرمەگە قامالعانى حابارلانادى.
فرانسيا ءىىم ناقتى ايىپتاۋلار، اتاپ ايتقاندا، ايىپتالۋشىلاردىڭ قاساقانا ارەكەتى تۋرالى تۇسىنىك بەرمەيدى. الايدا بوردو پروكۋرورى رەنو گودەل قالىپتاسقان جاعدايدا قاتاڭ ءتاسىلدىڭ ورىندى ەكەنىن مالىمدەدى.
«ورماندى جەردە تەمەكى تۇقىلىن تاستاعان نەمەسە مانگال جاققان ادامدارعا ومىرگە ءقاۋىپ ءتوندىرۋ ايىبىن قويۋ شارتتارى ورىندالادى. ءبىر كىشكەنتاي ۇشقىننىڭ ءوزى ءورت تۋدىرۋى مۇمكىن»، — دەدى ول.