فرانسيانىڭ سولتۇستىگىندە جۇما كۇنى كەشكە جولاۋشىلار پويىزى رەلستەن شىعىپ كەتتى. وقيعا «قاساقانا ارەكەتتىڭ» سالدارىنان بولدى ما، جوق پا — جەرگىلىكتى بيلىك سونى تەكسەرىپ جاتىر، دەپ حابارلايدى infohub.kz سايتى.
پروكۋرور سەباستەن گاللۋا سەنبى كۇنى رەلس جولىنان تەمىرجول بولىگىنىڭ سىنىعى تابىلعانىن ايتتى. ونىڭ جولدا قالاي پايدا بولعانى ازىرگە «بەلگىسىز».
جەرگىلىكتى بۇقارالىق اقپارات قۇرالدارىنىڭ مالىمەتىنشە، نورماندياداعى رۋان مەن كان قالالارى ارالىعىندا جۇرگەن پويىزدا 186 جولاۋشى بولعان. ولاردىڭ 44ء-ى جاراقات الىپ، مەديسينالىق كومەككە جۇگىنگەن. ونىڭ ىشىندە 18 جاستاعى قىز اۋىر حالدە تىكۇشاقپەن اۋرۋحاناعا جەتكىزىلدى.
رۋاننىڭ وڭتۇستىگىندەگى كلەون ماڭىنداعى وقيعا ورنىنا جەرگىلىكتى ۋاقىتپەن ساعات 20:00-گە (گرينۆيچ ۋاقىتىمەن 18:00) تامان 140-قا جۋىق ءورت ءسوندىرۋشى مەن باسقا دا قۇتقارۋ توپتارى جۇمىلدىرىلدى.
«كەنەتتەن بىرنەشە سىلكىنىس بولدى، سودان كەيىن شامامەن ءۇش سەكۋندتان سوڭ ول كۇشەيە ءتۇستى»، — دەدى پويىزداعى جولاۋشى لۋي ICI Normandie راديوسىنا بەرگەن سۇحباتىندا.
«مەن ەندى ورنىمدا وتىرا المادىم. تەرەزەلەر ءىشىنارا سىنىپ، جولدان كەلگەن تاستار ۆاگونعا كىردى. بۇل شىنىمەن شوشىتارلىق ەدى. ءالى دە دىرىلدەپ تۇرمىن»، — دەپ قوستى ول.
رۋان پروكۋراتۋراسىنىڭ مالىمدەۋىنشە، پويىز ءماشينيسى ەسىرتكى مەن الكوگولگە تەكسەرۋدەن وتكەندە ناتيجە تەرىس بولىپ شىققان.