فرانسيا پرەزيدەنتى ەممانۋەل ماكرون ساۋد ارابياسىنا فرانسۋز اسكەريلەرىن جىبەرۋگە نيەتتى ەكەنىن مالىمدەدى. ولار مۇناي وڭدەۋ زاۋىتى مەن شيكى مۇناي قىزىل تەڭىزدەگى يانبۋ پورتىنا قاراي اعىزاتىن قۇبىردى قورعايدى، دەپ حابارلايدى infohub.kz سايتى.
NUR.KZ ربك-گە سىلتەمە جاساپ حابارلاعانداي، ماكرون بۇل مالىمدەمەنى ءپاريجدىڭ جوسپارلارىن ءتۇسىندىرۋ بارىسىندا جاسادى. The Wall Street Journal دەرەگىنشە، اڭگىمە ساۋد ارابياسىنىڭ مۇناي ينفراقۇرىلىمىنىڭ ستراتەگيالىق ماڭىزدى نىسانىن قورعاۋعا كومەكتەسۋ تۋرالى بولىپ وتىر.
«ءبىز اسكەري قۇرالداردى، ياعني ساربازداردى، راديولوكاسيالىق جۇيەلەر مەن قورعانىس جۇيەلەرىن جىبەرىپ، وسى نىساندى قورعايمىز. پاريج ەشقانداي قاقتىعىسقا ارالاسپايدى. شەشىم ساۋد بيلىگىمەن كەلىسىلدى»، — دەدى ماكرون.
يانبۋ پورتى يرانمەن سوعىس باستالعاننان بەرى ەۋروپاعا ديزەل وتىنىن، شيكى مۇناي مەن باسقا دا مۇناي ونىمدەرىن جەتكىزۋدىڭ نەگىزگى توراپتارىنىڭ ءبىرى سانالادى. ول ساۋد ەكسپورتىنا ورمۋز بۇعازىن اينالىپ وتۋگە مۇمكىندىك بەرەدى.
تامىزدا ماكرون ساۋد ارابياسىنىڭ مۇراگەر حانزاداسى مۇحاممەد بين سالمانمەن كەزدەسىپ، ەكى كوشباسشى ءبىرقاتار ستراتەگيالىق كەلىسىمگە قول قويعان.
ەسكە سالايىق، بۇعان دەيىن ساۋد ارابياسىنىڭ ەنەرگەتيكا مينيسترلىگى بىرنەشە شابۋىلدان كەيىن «شىعىس — باتىس» مۇناي قۇبىرىنىڭ مەدينا مەن ەر-رياد اۋداندارىنداعى ۋچاسكەلەرىندەگى جۇمىسىن توقتاتقان.
بۇگىن حۋسيتتەر يەمەنگە جاسالعان سوققىلارعا جاۋاپ رەتىندە ەر-رياد پەن ساۋد ارابياسىنىڭ باتىسىنداعى يانبۋ قالاسىنداعى ماڭىزدى نىساندارعا شابۋىل جاساعانىن مالىمدەدى.