فرانسيانىڭ مەديسينالىق ساقتاندىرۋ جۇيەسى ميالگيالىق ەنسەفالوميەليتتى، كوبىنە سوزىلمالى شارشاۋ سيندرومى دەپ تانىمال اۋرۋدى، سوزىلمالى اۋرۋلار تىزىمىنە رەسمي تۇردە قوستى. ۇلتتىق مەديسينالىق ساقتاندىرۋ جۇيەسىنىڭ سايتىنداعى ءتيىستى وزگەرىستەر تامىز ايىندا-اق بايقالعان، دەپ حابارلايدى infohub.kz سايتى.
ميالگيالىق ەنسەفالوميەليت — ۇيقى مەن دەمالىستان كەيىن دە باسىلمايتىن ايقىن شارشاۋ باستى كورىنىسى بولاتىن سوزىلمالى اۋرۋ. وعان ۇيقىنىڭ بۇزىلۋى، زەيىن مەن ەستە ساقتاۋ قابىلەتىنىڭ ناشارلاۋى، سونداي-اق دەنە نەمەسە وي ەڭبەگىنەن كەيىن جاعدايدىڭ ايتارلىقتاي ناشارلاۋى ءتان.
سوڭعى سيمپتوم ماڭىزدىلاردىڭ ءبىرى سانالادى. ادام بۇرىن قيىندىق تۋدىرماعان جۇكتەمەدەن كەيىن ءوزىن الدەقايدا ناشار سەزىنۋى مۇمكىن. مۇنداي ناشارلاۋدان كەيىن قالپىنا كەلۋ كەيدە بىرنەشە كۇنگە، ءتىپتى اپتاعا سوزىلادى.
بۇل جاعدايدىڭ ناقتى سەبەبى ازىرگە بەلگىسىز. فرانسيانىڭ مەديسينالىق ساقتاندىرۋ جۇيەسىنىڭ دەرەگىنشە، كوپ جاعدايدا اۋرۋ ينفەكسيادان، كوبىنە ۆيرۋستىق ينفەكسيادان كەيىن باستالادى. ول سونداي-اق وپەراسيادان، ۋلى زاتتاردىڭ اسەرىنەن نەمەسە جاراقاتتان كەيىن دە تۋىنداۋى مۇمكىن.
الايدا «سوزىلمالى شارشاۋدى» راستايتىن ارنايى تالداۋ نەمەسە باسقا زەرتتەۋ ازىرگە جوق. دياگنوز سيمپتومدارعا سۇيەنە وتىرىپ جانە باسقا اۋرۋلاردى جوققا شىعارعاننان كەيىن قويىلادى.
فرانسيانىڭ مەديسينالىق ساقتاندىرۋ جۇيەسى ميالگيالىق ەنسەفالوميەليتتى پسيحولوگيالىق بۇزىلىس دەپ ساناۋعا بولمايتىنىن جەكە اتاپ ءوتتى. سونىمەن قاتار پسيحولوگيالىق كومەك پاسيەنتتى قولداۋ ءۇشىن، مىسالى، ۇرەي، دەپرەسسيا نەمەسە ۇزاققا سوزىلعان اۋرۋدىڭ سالدارى كەزىندە قولدانىلۋى مۇمكىن.
فرانسۋز ۇسىنىمدارى دەنە جۇكتەمەسىن بىرتىندەپ ارتتىرۋ باعدارلامالارىن دا اۋرۋدى ەمدەۋ ءتاسىلى رەتىندە قاراستىرمايدى. كەز كەلگەن دەنە بەلسەندىلىگى جەكە تاڭدالۋى ءتيىس.
فرانسيانىڭ مەديسينالىق ساقتاندىرۋ جۇيەسىنىڭ باعالاۋىنشا، COVID-19 پاندەمياسىنا دەيىن فرانسيادا وسى اۋرۋمەن اۋىراتىن 200 مىڭعا جۋىق ەرەسەك ادام بولعان. الايدا ۇلتتىق ەپيدەميولوگيالىق زەرتتەۋ ازىرگە جوق، ال پاندەميادان كەيىن پاسيەنتتەر سانى ارتۋى مۇمكىن. اۋرۋ ءارتۇرلى جاستاعى ادامداردا كەزدەسەدى، ءبىراق ايەلدەردە جيىرەك.
سوزىلمالى شارشاۋ سيندرومى ۇلىبريتانيا، اقش جانە ەۋروپالىق وداقتىڭ كەيبىر ەلدەرىنىڭ دەنساۋلىق ساقتاۋ جۇيەلەرىندە الدەقاشان بار. ميالگيالىق ەنسەفالوميەليت قازاقستاندا قولدانىلاتىن مەديسينالىق جىكتەۋدە دە كەزدەسەدى. اۋرۋلاردىڭ حالىقارالىق جىكتەۋىشىنىڭ ونىنشى قارالىمىندا وعان G93.3 كودى سايكەس كەلەدى — «ۆيرۋستىق اۋرۋدان كەيىنگى شارشاۋ سيندرومى (قاتەرسىز ميالگيالىق ەنسەفالوميەليت)». الايدا وسى اۋرۋدى ەمدەۋ جونىندەگى جەكە قازاقستاندىق كلينيكالىق حاتتاما تابىلمادى.
بۇگىندە ادامدى سوزىلمالى شارشاۋدان تولىق ارىلتاتىن ارنايى ەمدەۋ جالپى العاندا جوق. بۇعان دەيىن يممۋنولوگ Kursiv Health-كە تەمىردىڭ ءسىڭۋىن تومەندەتىپ، اعزانى قورعانىسسىز قالدىراتىن كۇندەلىكتى ادەتتەر تۋرالى ايتقان بولاتىن.