فرانسيانىڭ وڭتۇستىگىندەگى شاعىن اۋىلدى تورنادو كۇيرەتىپ، ونداعان ادام زارداپ شەكتى. بۇل تۋرالى جەرگىلىكتى بيلىك سەيسەنبىدە مالىمدەدى. قۇتقارۋشىلار پوماس اۋىلىن تورنادو قيراتقاننان كەيىن ىزدەۋ جۇمىستارىن جالعاستىرۋدا.
جەرگىلىكتى اكىمدىك وكىلىنىڭ ورىنباسارى ماري-ەلەن بۋيسساكتىڭ ايتۋىنشا، بارلىعى 39 ادام زارداپ شەككەن، ونىڭ ەكەۋى اۋىر جاعدايدا. ازىرگە حابار-وشارسىز كەتكەندەر جوق. شامامەن 300 ءۇي زاقىمدانىپ، تۇرعىنداردى ورنالاستىرۋ ءۇشىن ۋاقىتشا باسپانالار اشىلعان. ود دەپارتامەنتىنىڭ اكىمشىلىگى سەيسەنبى تاڭەرتەڭ 1400 ءۇي شارۋاشىلىعى جارىقسىز قالعانىن حابارلادى.
تورنادو 1000 تۇرعىنى بار اۋىلدا ۇلكەن اپات تۋعىزىپ، ۇيلەردى قيراتىپ، كوپتەگەن كولىكتى زاقىمدادى. ايماقتا سول كەزدە نايزاعايلى داۋىل تۋرالى ەسكەرتۋ جاريالانعان بولاتىن. جاقىن ماڭداعى مەتەوستانسيادا جەلدىڭ جىلدامدىعى ساعاتىنا 100 شاقىرىمنان اسقانى تىركەلدى. دۇيسەنبىدە فرانسيانىڭ وڭتۇستىگىندە وتكەن يسپانيا ۆۋەلتاسى ۆەلوجارىسىنىڭ ءۇشىنشى كەزەڭى بۇرشاق جاۋۋىنا بايلانىستى توقتاتىلدى.
ۇلتتىق مەتەورولوگيالىق قىزمەتىنىڭ (Meteo France) مالىمەتىنشە، فرانسيانىڭ قۇرلىقتىق بولىگىندە جىل سايىن بىرنەشە ونداعان تورنادو بولادى، ولاردىڭ كوپشىلىگى تومەن قارقىندى.