فرانسيا ەۋروپا وداعىندا 15 جاسقا دەيىنگى بالالارعا الەۋمەتتىك جەلىدە اككاۋنت اشۋعا تىيىم سالاتىن زاڭ قابىلداعان العاشقى ەل بولدى. تىيىم 2026 جىلدىڭ 1 قىركۇيەگىنەن باستاپ كۇشىنە ەنۋى مۇمكىن، دەپ حابارلايدى infohub.kz سايتى.
زاڭ جوباسى ۇلتتىق جينالىس پەن سەناتتا ماقۇلداندى، ەندى وعان پرەزيدەنت ەممانۋەل ماكرون قول قويۋى كەرەك. قۇجات سونىمەن قاتار الەۋمەتتىك پلاتفورمالارعا 2027 جىلدىڭ 1 قاڭتارىنا دەيىن 15 جاسقا تولماعان پايدالانۋشىلاردىڭ اككاۋنتتارىن جويۋدى تاپسىرادى. سونىمەن قاتار، زاڭ مەكتەپتىڭ جوعارى سىنىپتارىندا ۇيالى تەلەفونداردى پايدالانۋعا تىيىم سالادى.
جاڭا تالاپتارعا سايكەس، الەۋمەتتىك جەلىلەر فرانسۋزدىڭ دەربەس دەرەكتەردى قورعاۋ جونىندەگى رەتتەۋشىسىنىڭ نورمالارىنا سايكەس جاس تەكسەرۋ تەتىكتەرىن ەنگىزۋگە مىندەتتى. ول ءۇشىن ەۋروكوميسسيانىڭ باستاماسىمەن ازىرلەنىپ، ەو-نىڭ ءبىرقاتار ەلدەرىندە سىنالعان قوسىمشا قولدانىلۋى مۇمكىن.
بۇعان دەيىن ەۋروكوميسسيا باسشىسى ۋرسۋلا فون دەر ليايەن كامەلەتكە تولماعاندار ءۇشىن بۇكىل ەۋروپادا الەۋمەتتىك جەلىلەرگە جاس شەكتەۋلەرىن ەنگىزۋدى ۇسىنعان ەدى. ونىڭ ۇسىنىستارى 13 جاسقا دەيىنگى بالالارعا تولىق تىيىم سالۋدى جانە ۇلكەن جاسوسپىرىمدەرگە شەكتەۋلەردى قاراستىردى.