Freedom Holding Corp. ەنشىلەس قۇرىلىمى سانالاتىن Freedom Finance SPC كومپانياسى AIX بيرجاسىندا جىلدىق سىياقى مولشەرلەمەسى 8،5% بولاتىن ءۇش جىلدىق دوللارلىق وبليگاسيالاردى ورنالاستىراتىنىن حابارلادى. ءبىر قاعازدىڭ نومينالى $100 بولعاندىقتان، قۇرال ينۆەستورلاردىڭ كەڭ اۋقىمىنا قولجەتىمدى، ال سىياقى توقسان سايىن تولەنەدى، دەپ جازادى infohub.kz سايتى.
ورنالاستىرۋ 21 قىركۇيەككە جوسپارلانعان. اعىمداعى شىعارىلىمنىڭ جالپى كولەمى $500 ملن دەپ باعالانىپ وتىر. بۇل — جالپى كولەمى $1 ملرد بولاتىن وبليگاسيالىق باعدارلاما اياسىنداعى ەكىنشى ترانش.
بۇعان دەيىن ناۋرىزدا Freedom Finance وسىعان ۇقساس باعامەن $400 ملن سوماعا وبليگاسيا شىعاراتىنىن جاريالاعان بولاتىن. ول كەزدە قاعازدار ينۆەستيسيا قۇرالى رەتىندە ۇسىنىلدى: بروكەرلىك شوت اشقان سوڭ، ينۆەستيسيالاۋ بولىمىندە ساۋدا تاپسىرىسىن جىبەرىپ، ولاردى Freedom Broker ساۋدا الاڭىنان ساتىپ الۋعا بولاتىن.
ايتا كەتەيىك، وبليگاسيا ساتىپ الۋ دوللارلىق جيناقتى سالىم ەتۋدىڭ ءبىر جولىنا اينالۋى مۇمكىن. سالىستىرۋ ءۇشىن: جەكە تۇلعالارعا ارنالعان ۆاليۋتالىق دەپوزيتتەر بويىنشا ەڭ جوعارى مولشەرلەمە 1%-دى قۇرايدى. قازاقستان قور بيرجاسىندا دوللارلىق وبليگاسيالار 11–12%-عا دەيىنگى كىرىستىلىكپەن ساۋدالانادى، الايدا قاعازدىڭ ەڭ تومەنگى باعاسى قىمباتىراق بولۋى مۇمكىن ءارى ساتىپ الۋ ءۇشىن بروكەر قىزمەتىنە جۇگىنۋ قاجەت.