Freedom Holding Corp. قازاقستاندىق ءبىلىم بەرۋ تەحنولوگيالىق كومپانياسى Bilim Group-تىڭ ۇلەسىن ساتىپ الىپ، ونىڭ نەگىزگى قاتىسۋشىسى اتاندى. مامىلە ق ر باسەكەلەستىكتى قورعاۋ جانە دامىتۋ اگەنتتىگىمەن ماقۇلداندى، بۇل تاراپتارعا بىرلەسكەن ستراتەگيانى جۇزەگە اسىرۋعا كىرىسۋگە مۇمكىندىك بەرەدى، دەپ حابارلايدى infohub.kz سايتى.
ينۆەستيسيالار ءبىلىم بەرۋ سەكتورىن سيفرلىق ترانسفورماسيالاۋعا جانە قازاقستاندىق IT-ونىمدەردىڭ ەكسپورتتىق الەۋەتىن قۇرۋعا باعىتتالعان. پەرسپەكتيۆالىق زەرتتەۋلەردى دامىتۋ، وزىق وقۋ كونتەنتىن جاساۋ جانە جاساندى ينتەللەكت (جي) نەگىزىندە ءبىلىم بەرۋ اناليتيكاسىنىڭ قۇرالدارىن ەنگىزۋ جوسپارلانۋدا.
Freedom Holding Corp. باس اتقارۋشى ديرەكتورى تيمۋر تۋرلوۆ جاڭا تەحنولوگيالاردىڭ ينتەگراسياسى حولدينگتىڭ قولدانىستاعى ەكوجۇيەسىنىڭ مۇمكىندىكتەرىن كەڭەيتەتىنىن اتاپ ءوتتى. «ءبىز ءۇشىن بۇل قازاقستان مەن ورتالىق ازياداعى EdTech-قىزمەتتەردى ەڭ وزىق تەحنولوگيالار ارقىلى دامىتۋعا باعىتتالعان ستراتەگيالىق قادام. قارجىلىق جانە ءبىلىم بەرۋ تەحنولوگيالارىنىڭ سينەرگياسى ميلليونداعان پايدالانۋشىلار ءۇشىن جاڭا مۇمكىندىكتەر جاساپ، ىڭعايلى فورماتتا جانە تەگىن پايدالى الەۋمەتتىك ماڭىزدى قىزمەتتەردى ۇسىنۋعا مۇمكىندىك بەرەدى دەپ سەنەمىز. وسى باعىت اياسىندا ءبىز OpenAI-مەن قول قويىلعان كەلىسىم نەگىزىندە ىنتىماقتاستىقتى دامىتۋدى جوسپارلاپ وتىرمىز. سونداي-اق EdTech-قىزمەتتەردى SuperApp-قا ينتەگراسيالاپ، بىرتىندەپ پايدالانۋشىلار سانىن ارتتىرامىز»، — دەدى ول.
Bilim Group نەگىزىن قالاۋشى راۋان كەنجەحان ۇلى ەكى كومپانيانىڭ رەسۋرستارىن بىرىكتىرۋ كوپجىلدىق ىنتىماقتاستىقتىڭ لوگيكالىق جالعاسى ەكەنىن اتاپ ءوتتى. بۇعان دەيىن پلاتفورمالار Freedom Bank-پەن بىرلەسكەن جوبانى جۇزەگە اسىرعان بولاتىن، ونىڭ اياسىندا قازاقستاندىق وقۋشىلار جوعارى اكادەميالىق ۇلگەرىم ءۇشىن قارجىلاي سىياقى الۋ مۇمكىندىگىنە يە بولدى. «كومپەتەنسيالار مەن رەسۋرستاردى بىرىكتىرۋ يننوۆاسيالاردى تەزىرەك جانە تيىمدىرەك ەنگىزۋگە، سونداي-اق سيفرلىق ءبىلىم بەرۋ شەشىمدەرىنىڭ تۇراقتى دامۋىن قولداۋعا مۇمكىندىك بەرەدى دەپ سەنەمىز. بۇل قازىرگى الەمدە ادامي كاپيتالدىڭ ءوسۋىنىڭ كەپىلى»، — دەپ تۇيىندەدى كەنجەحان ۇلى.
Bilim Group — ورتالىق ازياداعى ەڭ ءىرى EdTech-كومپانيا، 2011 جىلى قۇرىلعان. ستارتاپ ءبىلىم بەرۋ پروسەستەرىن اۆتوماتتاندىرۋعا، كادرلىق ەسەپكە الۋعا جانە سيفرلىق كىتاپحانالارعا ارنالعان IT-قىزمەتتەردى بىرىكتىرەدى. ەكوجۇيەنىڭ كۇندەلىكتى اۋديتورياسى ءبىر ميلليون بىرەگەي پايدالانۋشىعا جەتەدى.
2025 جىلدىڭ قاراشاسىندا ۆاشينگتوندا Freedom Holding Corp. قاتىسۋىمەن OpenAI كورپوراسياسىمەن ستراتەگيالىق مەموراندۋمعا قول قويىلدى. وسى كەلىسىمنىڭ ارقاسىندا 160 مىڭنان استام قازاقستاندىق ءمۇعالىم BilimClass پلاتفورماسى ارقىلى ChatGPT Edu نەيروجەلىسىنىڭ ءقاۋىپسىز ءبىلىم بەرۋ نۇسقاسىنا قول جەتكىزدى.
Freedom Holding Corp. — الەمنىڭ 22 ەلىندە (اقش، كيپر جانە قازاقستاندى قوسا العاندا) ۇسىنىلعان ءارتاراپتاندىرىلعان حالىقارالىق توپ. كومپانيا شتاتى 11،8 مىڭنان استام قىزمەتكەردى قۇرايدى. حولدينگ اكسيالارى امەريكاندىق Nasdaq Capital Market بيرجاسىندا FRHC تيكەرىمەن ساتىلادى. توپتىڭ ەكوجۇيەسىنە بانكينگ، ساقتاندىرۋ، بروكەرلىك قىزمەتتەر، تەلەكوممۋنيكاسيا جانە lifestyle-قىزمەتتەر كىرەدى.