اقش-تىڭ فەدەرالدىق ساۋدا كوميسسياسى (FTC) تۇتىنۋشىلاردىڭ جەكە دەرەكتەرىنە قاراپ باعانى جاسىرىن وزگەرتەتىن كومپانيالارعا قاتىستى جاڭا ساياسات ۇسىندى. بۇل تۋرالى infohub.kz سايتى حابارلايدى.
FTC ۇسىنعان قۇجاتقا سايكەس، ساتىپ الۋشىنىڭ تولەۋگە دايىن سوماسىن بولجاپ، باعانى جەكەلەي وزگەرتەتىن ساتۋشىلار فەدەرالدى دەڭگەيدە جاۋاپقا تارتىلۋى مۇمكىن. كوميسسيا ءتوراعاسى ەندريۋ فەرگيۋسوننىڭ ايتۋىنشا، تۇتىنۋشىلار تىزىمدەگى باعانى كورگەندە، ونىڭ بارلىعىنا بىردەي قولجەتىمدى ەكەنىن كۇتەدى، الايدا كەيبىر ساتۋشىلار جەكە دەرەكتەر نەگىزىندە باعانى وزگەرتەدى.
FTC بۇل ماسەلەنى بۇرىننان باقىلاپ كەلەدى. 2025 جىلعى قاڭتارداعى الدىن الا ەسەپتە اگەنتتىك ازىق-ت ۇلىك دۇكەندەرى مەن كيىم ساتاتىن كومپانيالار ءۇشىنشى تاراپ ۇيىمدارىنىڭ كومەگىمەن تۇتىنۋشىلاردىڭ ورنالاسقان جەرى، شولۋ تاريحى جانە ۆيرتۋالدى سەبەتتە تاۋاردى قانشا ۋاقىت ۇستاعانىنا قاراپ باعانى جەكەلەندىرەتىنىن انىقتاعان. مىسالى، جاڭا اتا-انا رەتىندە پروفيلدەنگەن تۇتىنۋشىعا ىزدەۋ ناتيجەلەرىنىڭ ءبىرىنشى بەتىندە قىمباتىراق بالالار تەرمومەترلەرى كورسەتىلۋى مۇمكىن.
فەرگيۋسون FTCء-تىڭ جەكەلەندىرىلگەن باعانى تولىق تىيىم سالۋعا قۇقىعى جوق ەكەنىن ايتادى. الايدا ۇسىنىلىپ وتىرعان ساياسات بويىنشا، بيزنەس سۋبەكتىلەرى جەكەلەندىرىلگەن باعانى قولداناتىن بولسا، بۇل تۋرالى «ايقىن جانە كورنەكى تۇردە» حابارلاۋى جانە باعانى انىقتاۋ ءۇشىن قانداي دەرەكتەردى پايدالاناتىنىن كورسەتۋى ءتيىس.
ساياساتتا جەكەلەندىرىلگەن باعانى اشپاي قولداناتىن كومپانيالار نارىقتاعى ادىلەتسىز نەمەسە الدامشى ارەكەتتەرگە تىيىم سالاتىن FTC زاڭىن بۇزاتىنى كورسەتىلگەن. كوميسسيا بۇل ساياسات بويىنشا 30 كۇن ىشىندە قوعامدىق پىكىر جينايدى.