گايانا بيلىگى وتكەن دەمالىس كۇندەرى تەڭىزدە بولعان پاروم اپاتىنان قازا تاپقاندار سانىن كەم دەگەندە 41 ادامعا دەيىن كوتەردى. بۇل تۋرالى infohub.kz سايتى حابارلايدى.
سەيسەنبىدە رەسمي وكىلدەر ىزدەۋ توپتارى تاعى 14 ءمايىتتى تاپقانىن مالىمدەدى. وعان دەيىن سەنبى كۇنى تۇندە «بەريما» پارومى اۋدارىلىپ، 27 ادام قازا تاپقان ەدى. 77 ادام قۇتقارىلدى. ىزدەۋ جاساقتارى بىرنەشە ادامدى ءالى دە ىزدەستىرۋدە.
پارومدا بارلىعى 179 ادام بولعانىمەن، جولاۋشىلار تىزىمىندە تەك 133 ادام كورسەتىلگەن، دەپ حابارلادى شەنەۋنىكتەر. گايانانىڭ قوعامدىق جۇمىستار ءمينيسترى حۋان ەدگيلل بۇل اپاتتى سوڭعى ونجىلدىقتارداعى ەڭ اۋىر تەڭىز اپاتى دەپ اتاپ، بيلىك جوعالعانداردى تابۋ ءۇشىن بار كۇشىن سالىپ جاتقانىن ايتتى.
ۇكىمەت اپات ورنىنا 16 كەمە جىبەرىلگەنىن، فرانسۋز جانە جەرگىلىكتى سۇڭگۋىرلەر ىزدەۋ جۇمىستارىن جۇرگىزىپ جاتقانىن حابارلادى. پاروم استانا دجوردجتاۋننان گايانانىڭ ىشكى ايماعى ەسسەكيبوداعى پورت-كايتۋماعا بەت العان كەزدە اۋدارىلدى.
بيلىك تولىق ەمەس جولاۋشىلار ءتىزىمى مەن ەكيپاج مۇشەلەرىنىڭ اراسىندا ەسىرتكى قولدانۋ اپاتقا ىقپال ەتكەن فاكتورلار بولۋى مۇمكىن ەكەنىن اتاپ ءوتتى. پوليسيا پاروم كاپيتانى مەن كەم دەگەندە تاعى ءبىر ەكيپاج مۇشەسىنىڭ ماريحۋانا سىناماسى وڭ ناتيجە كورسەتكەننەن كەيىن قاماۋعا الىنعانىن حابارلادى.
«ءبىز ەكيپاج مۇشەلەرىنىڭ جۇمىس كەزىندە ىشىمدىك ىشۋىنە نەمەسە تەمەكى شەگۋىنە مۇلدەم جول بەرمەيمىز. ال كاپيتاننان وڭ ناتيجە الۋىمىز – بۇل وتە ماڭىزدى ماسەلە»، - دەدى ەدگيلل.
«VesselFinder» كەمە تىزىلىمىنە سايكەس، پاروم 1939 جىلى سالىنعان. ادەتتە كەمەلەر تەڭىزبەن ءجۇزىپ، وزەنگە جەتكەننەن كەيىن پورت-كايتۋماعا بارادى، بۇل قالا تىڭ ورمان ىشىندە ورنالاسقان.
گايانا – وڭتۇستىك امەريكانىڭ سولتۇستىك-شىعىسىندا ورنالاسقان، اعىلشىن ءتىلدى شاعىن مەملەكەت. ول كورشى ۆەنەسۋەلامەن مۇنايعا باي ەسسەكيبو ايماعى ءۇشىن اۋماقتىق داۋدا.