گالاپاگوس ارحيپەلاگىنداعى فلورەانا ارالىنا شامامەن ەكى عاسىردان كەيىن الىپ گالاپاگوس تاسباقالارى قايتا ورالدى. گالاپاگوس ۇلتتىق پاركى ديرەكسياسىنىڭ ماماندارى مەن ەكولوگيالىق ۇيىمداردىڭ وكىلدەرى ارالعا 158 جاس تاسباقا جىبەردى، دەپ حابارلايدى infohub.kz سايتى.
بۇل ءتۇردىڭ پوپۋلياسياسىن تەڭىزشىلەر مەن كيت اۋلاۋشىلار XIX عاسىردىڭ ورتاسىندا تولىعىمەن جويىپ جىبەرگەن بولاتىن. الايدا عالىمدار كورشىلەس يسابەلا ارالىنداعى ۆولف جانارتاۋىنىڭ ماڭىنان تابىلعان گيبريد داراقتار مەن كوپجىلدىق ءوسىرۋ باعدارلاماسىنىڭ ارقاسىندا گەنەتيكالىق جەلىنى قالپىنا كەلتىرە الدى.
باۋىرىمەن جورعالاۋشىلاردى تابيعي ورتاسىنا قايتارۋ وپەراسياسى رەيندجەرلەر مەن ەرىكتىلەردەن اسقان كۇش-جىگەردى تالاپ ەتتى. سالماعى 13-22 كەلىگە دەيىنگى ءاربىر تاسباقانى ارنايى ريۋكزاك-كونتەينەرلەرگە سالىپ، جانارتاۋلىق بەدەرلى جەر مەن قالىڭ توعايدىڭ ىشىمەن كوپتەگەن شاقىرىمدى جاياۋ ءجۇرىپ ءوتتى.
ەكولوگتار الىپ تاسباقالاردىڭ ارال ەكوجۇيەسىندەگى ءرولى ەرەكشە ەكەنىن اتاپ وتەدى. ولار اۋماقتى ارالاپ ءجۇرىپ، وسىمدىك تۇقىمدارىن تاراتادى، وسىمدىك جامىلعىسىن قالىپتاستىرادى جانە باسقا جەرگىلىكتى تۇرلەردىڭ تىرشىلىگىنە قاجەتتى جاعداي جاسايدى. عالىمدار ارحيپەلاگتىڭ تابيعي تەپە-تەڭدىگىن تولىق قالپىنا كەلتىرۋ ءۇشىن رەينترودۋكسيا باعدارلامالارىن جالعاستىرماق.