قاراعاندى وبلىستىق سوتىنىڭ جاڭا ءتوراعاسى بولىپ عالىم كۇلەكەيەۆ تاعايىندالدى. ول بۇعان دەيىن وبلىستىڭ ازاماتتىق ىستەر جونىندەگى سوت القاسىن باسقارعان، دەپ حابارلايدى infohub.kz.
جوعارعى سوتتىڭ ءتوراعاسى اسلامبەك مەرعالييەۆ قاراعاندى وبلىسى سۋديالار كورپۋسىنا جاڭا باسشىنى تانىستىردى. ءىس-شارا بارىسىندا ول وبلىستىق سوت ءتوراعاسى قىزمەتىن اياقتاپ، زەينەتكەرلىككە شىققان ەردەن ارىپوۆكە العىسىن ءبىلدىرىپ، ونىڭ وبلىستىڭ سوت جۇيەسىن دامىتۋعا قوسقان ۇلەسىن اتاپ ءوتتى. «جاڭا باسشىنى تانىستىرا وتىرىپ، جوعارعى سوت ءتوراعاسى عالىم كۇلەكەەۆتىڭ سوت جۇيەسىندە مول تاجىريبەسى بارىن، سۋديالار قاۋىمى اراسىندا لايىقتى بەدەلگە يە ەكەنىن جانە كىرشىكسىز كاسىبي رەپۋتاسياسى بار ەكەنىن اتاپ ءوتتى»، — دەلىنگەن حابارلامادا. مەرعالييەۆ كۇلەكەەۆتىڭ باسشىلىعىمەن قاراعاندى وبلىستىق سوتى سوت تورەلىگىن جۇزەگە اسىرۋ ساپاسىن ودان ءارى ارتتىرىپ، ازاماتتار مەن ۇيىمداردىڭ قۇقىقتارىن ءتيىمدى قورعاپ، سوت بيلىگىنە قوعام سەنىمىن نىعايتۋ جۇمىسىن جالعاستىراتىنىنا سەنىم ءبىلدىردى.
عالىم باتىربەك ۇلى كۇلەكەيەۆ 1979 جىلى جامبىل وبلىسىنىڭ قاراتاۋ قالاسىندا دۇنيەگە كەلگەن. 2000 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ زاڭ فاكۋلتەتىن، 2002 جىلى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ ەكونوميكا فاكۋلتەتىن، ال 2024 جىلى وسى وقۋ ورنىنىڭ زاڭ فاكۋلتەتىنىڭ ماگيستراتۋراسىن بىتىرگەن. 2000–2007 جىلدارى سوت جۇيەسىندە جانە مەملەكەتتىك ورگانداردا ءارتۇرلى لاۋازىمداردى اتقارعان. 2007–2010 جىلدارى استانا قالاسىنىڭ الماتى اۋداندىق سوتىنىڭ سۋدياسى، 2010–2012 جىلدارى جامبىل وبلىسىنىڭ جامبىل اۋداندىق سوتىنىڭ ءتوراعاسى، 2012 جىلدان 2024 جىلعا دەيىن جامبىل وبلىستىق سوتىنىڭ سۋدياسى بولعان. 2024 جىلدان بەرى قاراعاندى وبلىستىق سوتىنىڭ ازاماتتىق ىستەر جونىندەگى سوت القاسىنىڭ ءتوراعاسى قىزمەتىن اتقارىپ كەلگەن.