قارتتاردىڭ كوز تورىنىڭ قابىنۋى كوزدىڭ كومەكشى جاسۋشالارىنىڭ جاڭا نەيروندارعا اينالۋىنا كەدەرگى كەلتىرەدى، بۇل گلاۋكومانى ەمدەۋدى قيىنداتادى. بۇل تۋرالى SciTechDaily پورتالى جازىپ، infohub.kz سايتى حابارلادى.
سۋني اپستەيت مەديسينالىق ۋنيۆەرسيتەتىنىڭ ماماندارى لەۆي توددتىڭ جەتەكشىلىگىمەن كوز تورى نەيروندارىن قالپىنا كەلتىرۋ ادىستەرىنىڭ قارتايعان اعزادا نەگە ءتيىمسىز بولاتىنىن انىقتادى. جاس كەزىندە قايتا باعدارلامالانىپ، ولگەن جۇيكە جاسۋشالارىنىڭ ورنىن باسا الاتىن گليالىق كومەكشى جاسۋشالار جىلدار وتە بۇل قابىلەتىنەن ايىرىلادى. سەبەبى — حرونوبيولوگيالىق وزگەرىستەر مەن جۇيەلى قابىنۋ.
تىشقاندارعا جۇرگىزىلگەن تاجىريبەلەر بارىسىندا بيولوگتار كوز تورىنىڭ گەماتوەنسەفالدىق بوگەتىنىڭ بىرتىندەپ بۇزىلاتىنىن بايقادى. بۇل گليانىڭ ساۋ نەيروندارعا اينالۋىنا قاجەتتى مولەكۋلالىق سيگنالداردى بوگەيتىن قابىنۋ پروسەستەرىن كۇشەيتەدى. سونىمەن قاتار جاسۋشالاردىڭ ءوزى دە ۋاقىت وتە يكەمدىلىگىن جوعالتىپ، باسقارۋشى اقۋىزدارعا — ترانسكريپسيا فاكتورلارىنا ناشار جاۋاپ بەرەدى.
زەرتتەۋ اۆتورلارى قابىنۋعا قارسى ستەرويدتاردىڭ كومەگىمەن قارتايعان جاسۋشالاردىڭ قالپىنا كەلۋ قابىلەتىن ءىشىنارا قايتارىپ الدى. ءارى قاراي زەرتتەۋشىلەر بوگەۋدىڭ ناقتى مولەكۋلالىق مەحانيزمدەرىن انىقتاپ، مونوكلونالدى انتيدەنەلەرگە نەگىزدەلگەن نۇكتەلى پرەپاراتتار جاساۋدى جوسپارلاپ وتىر. بۇل گلاۋكومامەن جانە باسقا دا جاسقا بايلانىستى اۋرۋلارمەن اۋىراتىن ناۋقاستاردىڭ كورۋ قابىلەتىن قالپىنا كەلتىرۋگە مۇمكىندىك بەرەدى.