جاھاندىق جىلىنۋ مەن ەل-نينو تابيعي قۇبىلىسىنىڭ قاتار ءتۇسۋى كليماتولوگتار ازىرگە دايىن ەمەس تابيعي اپاتتارعا اكەلۋى مۇمكىن، دەپ جازادى Gizmodo باسىلىمى. عالىمداردىڭ الاڭداۋشىلىعى تۋرالى infohub.kz سايتى حابارلايدى.
مامانداردىڭ ايتۋىنشا، بولىپ جاتقان كليماتتىق وزگەرىستەر ادەتتەگى جاھاندىق بايلانىستاردى بۇزادى. بۇرىن ەل-نينو پلانەتانىڭ ءتۇرلى ايماقتارىندا بولجامدى جاعدايلار تۋعىزاتىن، ال ءقازىر بۇرىنعى سحەمالار جۇمىس ىستەمەي قالدى. بار-يلان ۋنيۆەرسيتەتىنىڭ كليماتولوگى ەران ۆوس قازىرگى جاعدايدا ەسكى مودەلدەردىڭ كۇشى جوق ەكەنىن اتاپ ءوتتى: جاھاندىق جىلىنۋ سالدارىنان تاريحي كليماتتىق تىزبەكتەر بۇزىلىپ نەمەسە كەرى اينالىپ، جاڭا بەلگىسىزدىكتەر تۋعىزىپ وتىر.
زەرتتەۋشىلەر سوڭعى ونجىلدىقتارداعى مەتەورولوگيالىق دەرەكتەردى تالداپ، ەرەكشە قۇبىلىستاردى انىقتادى. اتاپ ايتقاندا، 1960–1990 جىلدارى ەل-نينو كەزىندە جىلىنۋ تىركەلگەن وڭتۇستىك ازيا مەن سولتۇستىك-شىعىس افريكا ايماقتارى ەندى انومالدى سۋىقتىققا تاپ بولىپ وتىر. ءوز كەزەگىندە باتىس ەۋروپادا بۇرىنعى سۋىق تولقىندار ورنىنا تەمپەراتۋرا ايتارلىقتاي كوتەرىلەتىن كەزەڭدەر كەلدى.
احۋالدى قيىنداتاتىنى — قازىرگى ەل-نينو سوڭعى ونجىلدىقتارداعىداي تىنىق مۇحيتتىڭ ورتالىق بولىگىندە ەمەس، شىعىس بولىگىندە قالىپتاستى. اقش ۇلتتىق اتموسفەرالىق زەرتتەۋلەر ورتالىعىنىڭ اعا عىلىمي قىزمەتكەرى كلارا دەسەر بۇرىنعى تاجىريبەنىڭ ەندى سەنىمدى باعدار بولا المايتىنىن اتاپ ءوتتى، ويتكەنى پلانەتا مۇلدە جاڭا كليماتتىق بازالىق دەڭگەيگە ءوتتى.