گانا پارلامەنتى كاكاو فەرمەرلەرىنە ۇكىمەتتىڭ رۇقساتىنسىز فەرمالارىن باسقا ماقساتقا پايدالانعانى ءۇشىن 20 جىلعا دەيىن باس بوستاندىعىنان ايىرۋدى كوزدەيتىن زاڭ جوباسىن قابىلدادى. بۇل تۋرالى Associated Press اگەنتتىگى حابارلادى. جاڭا شارا بەيسەنبىدە قابىلدانعانىمەن، زاڭنىڭ مازمۇنى تەك جەكسەنبى كۇنى كەشكە جاريا بولدى. پرەزيدەنت دجون ماحاما ازىرگە زاڭعا قول قويعان جوق.
زاڭ بارلىق كاكاو فەرمالارىنا قورعاۋ مارتەبەسىن بەرىپ، ولاردى رۇقساتسىز باسقا ماقساتقا پايدالانۋدى قىلمىس دەپ تانيدى. بۇل فەرمەرلەر تاراپىنان سىنعا ۇشىرادى.
«زاڭ قازىرگى كۇيىندە قالسا، بۇل ادىلەتسىز»، — دەيدى گانا كووپەراتيۆتىك كاكاو فەرمەرلەرى جانە ماركەتينگ قاۋىمداستىعىنىڭ اكىمشىسى ءارى كاكاو فەرمەرى موزەس دجان اسيەدۋ. ونىڭ ايتۋىنشا، كوپتەگەن فەرمەرلەر جەر ساتىپ الۋعا، ونى تازارتۋعا جانە كاكاو فەرماسىن كۇتىپ-ۇستاۋعا جىلدار بويى ءوز قاراجاتىن جۇمسايدى، ال تابىس تابا باستاعانعا دەيىن ۇكىمەت تاراپىنان قولداۋ از.
«ەگەر كاكاو — ۇلتتىق قۇندىلىق بولسا، وندا فەرمەرگە دە ءوندىرىس شىعىندارىنىڭ ءبىر بولىگىن جابۋعا كومەكتەسۋ كەرەك»، — دەدى ول. ەڭ قاتاڭ جازا زاڭسىز التىن وندىرۋگە قاراستىرىلعان: 10-20 جىل باس بوستاندىعىنان ايىرۋ جانە ءاربىر زاقىمدالعان كاكاو اعاشى ءۇشىن ايىپپۇل.
باتىس افريكادا جۇزدەگەن مىڭ فەرمەر كاكاو وسىرۋمەن كۇن كورەدى. كورشىلەس كوت-د'يۆۋاردا كاكاو بۇرشاقتارىنىڭ ەكسپورتى جالپى ەكسپورتتىق تابىستىڭ 40 پايىزىن قۇرايدى. گانادا بۇل كورسەتكىش شامامەن 15 پايىزعا جەتەدى.
مەملەكەتتىك رەتتەۋشىلەر ءار وتىرعىزۋ ماۋسىمىنىڭ باسىندا كاكاو بۇرشاعىنا بەلگىلەنگەن باعا بەلگىلەيدى، ال بۇرشاقتاردىڭ كوپشىلىگى فەرمەرلەردى حالىقارالىق نارىقتاعى باعا اۋىتقۋلارىنان قورعاۋ ءۇشىن مەملەكەتتىك ليسەنزياسى بار تاراپتار ارقىلى ساتىلادى.
الايدا، 2024 جىلى حالىقارالىق نارىقتا كاكاو فيۋچەرستەرىنىڭ كۇرت وسۋىنەن كەيىن، فيۋچەرستەر — بولاشاقتا كەلىسىلگەن باعامەن تاۋار ساتىپ الۋعا ارنالعان كەلىسىمشارت — مەتريكالىق تونناسىنا 12 000 دوللاردان اسىپ، سوڭعى ونجىلدىقتارداعى ەڭ جوعارى دەڭگەيگە جەتتى. سودان كەيىن ۇسىنىس سۇرانىستان اسىپ، باعا شامامەن 4 000 دوللارعا دەيىن قۇلدىرادى.