ورتالىق ازيادان شىققان ءبىلىم بەرۋ جوباسى العاش رەت گارۆارد بيزنەس مەكتەبىنىڭ بيزنەس-كەيسىنە اينالدى. زەرتتەۋ ورتالىعىندا IQanat جوباسى تۇر. بۇل تۋرالى جوبا وكىلدەرى مالىمدەدى... دەپ حابارلايدى infohub.kz.
«الەمدەگى ۇزدىك بيزنەس مەكتەپتەرىنىڭ ءبىرى – Harvard Business School – جوبانى ءوزىنىڭ وقۋ كەيس-بازاسىنا ەنگىزگەندە، بۇل ونىڭ الدىندا جاي عانا شابىتتاندىراتىن وقيعا ەمەس، الەمنىڭ ءتۇرلى ەلدەرىندەگى ستۋدەنتتەر مەن زەرتتەۋشىلەر ءۇشىن ماڭىزدى، جۇمىس ىستەيتىن مودەل تۇرعانىن بىلدىرەدى. وسىنداي تالداۋدىڭ ورتالىعىندا IQanat تۇر، ال ءبىز ءۇشىن قازاقستاندا جاسالعان تاجىريبەنىڭ ەل شەگىنەن تىس جەرلەردە قىزىعۋشىلىق تۋدىرۋى ەرەكشە ماڭىزدى»، – دەپ اتاپ ءوتتى IQanat اتقارۋشى ديرەكتورى ازامات اشامايەۆ.
كەيس اۆتورى، پروفەسسور بوريس گرويسبەرگ جاقىندا اقش-تان قازاقستانعا ۇشىپ كەلدى. ال 20 تامىزدا بوروۆويدەگى IQanat مەكتەبىندە كەيستىڭ رەسمي تۇساۋكەسەرىن وتكىزدى. بوريس گرويسبەرگ وقۋشىلارمەن، تۇلەكتەرمەن، مۇعالىمدەرمەن، قامقورشىلارمەن جانە قور كومانداسىمەن – ياعني كەيستىڭ ناقتى كەيىپكەرلەرىمەن سەسسيا وتكىزدى.
زەرتتەۋدە IQanat ەلدىڭ شالعاي اۋىلدارىنداعى بالالاردىڭ اكادەميالىق الەۋەتىن قالاي انىقتايتىنى، ولارعا ءبىلىم الۋعا كومەكتەسەتىنى جانە قارجىلىق تۇراقتى بىرەگەي مودەلدى دامىتاتىنى باياندالادى. جوبانىڭ قامقورشىلىق جۇيەسى قايىرىمدىلىقتى ءبىر رەتتىك ارەكەت ەمەس، ۇزاق مەرزىمدى قولداۋعا اينالدىرادى. ءقازىر IQanat-تى 260-تان استام مەسەنات قولدايدى، ال كاسىپكەرلەر ونى دامىتۋعا 8 جىلدان استام ۋاقىت قاتىسىپ كەلەدى.
IQanat وليمپياداسىنان جىل سايىن ونداعان مىڭ اۋىل بالاسى وتەدى، بيىل 60 مىڭنان استام. ولاردىڭ اراسىندا ساپالى ءبىلىم الۋ مۇمكىندىگى شەكتەۋلى، الەۋمەتتىك وسال وتباسىلاردان شىققان بالالار دا از ەمەس. جوبانىڭ باستى ەرەكشەلىگى – «جەڭدى – ءوتتىڭ، جەڭىلدى – شىقتىڭ» قاعيداتىنان باس تارتۋ: ءتىپتى IQanat مەكتەپ-ينتەرناتىندا وقۋعا گرانت الماعان وقۋشىلار دا تالىمگەرلىك جانە ءبىلىم بەرۋ قولداۋى ارقىلى ەكوجۇيەدە قالادى. گارۆارد ءۇشىن IQanat مودەلىنىڭ ونداعان جىلدار بويى جۇمىس ىستەۋ جانە ءوزىن-وزى جاڭعىرتۋ قابىلەتى ەرەكشە قىزىقتى. ونىڭ ءبىر مىسالى – Peer-to-Peer باعدارلاماسى: اۋىلدارداعى مىقتى جوعارى سىنىپ وقۋشىلارى اۋىلدىڭ كىشى سىنىپ وقۋشىلارىنا تيۋتور جانە ءمۇعالىم بولادى. وسىلايشا قولداۋ العان بالا ءوزى كەلەسى ۇرپاققا كومەكتەسە باستايدى، جاقسىلىقتى ءارى قاراي جالعاستىرادى. قور باعدارلامالارىنىڭ ناتيجەلەرى بويىنشا، جوبا تۇلەكتەرىنىڭ 94%-ى گرانتقا جوعارى وقۋ ورىندارىنا ءتۇسىپ، الەمنىڭ 19 ەلىندە ءبىلىم الادى.
كەيستىڭ تۇساۋكەسەرىنە IQanat مەكتەبىنە قازاقستانداعى يۋنيسەف وكىلى راشەد مۋستافا سارۆار دا كەلدى. ول IQanat بالالاردىڭ ءبىلىم ساپاسى مەن ادامي كاپيتالدى دامىتۋدىڭ جوعارى ستاندارتىن بەلگىلەيتىنىن، ال جوبا جيناقتاعان تاجىريبە باسقا ەلدەردە بەيىمدەۋ مەن تاراتۋعا لايىق ەكەنىن اتاپ ءوتتى.
IQanat اكادەميالىق ديرەكتورى زۋحرا شەگەنوۆا: «گارۆارد ءۇشىن IQanat – ورتالىق ازيادان شىققان سيرەك مىسال، ونى الەۋمەتتىك ميسسيا تۇرعىسىنان عانا ەمەس، الەۋمەتتىك ينۆەستيسيالاردىڭ قايتارىمى تۇرعىسىنان دا قاراستىرادى. بۇل IQanat-تى اۋماقتىق تەڭسىزدىك، اۋىلدارداعى كادر تاپشىلىعى جانە ساپالى بىلىمگە قولجەتىمدىلىكتىڭ شەكتەۋلىلىگى سياقتى ۇقساس ماسەلەلەرى بار ەلدەر قولدانا الاتىن مودەلگە اينالدىرادى»، – دەپ اتاپ ءوتتى.
IQanat – اۋىل بالالارىنىڭ ومىرلىك تراەكتورياسىن وزگەرتۋدى قالايتىن قازاقستاندىق كاسىپكەرلەردىڭ الەۋمەتتىك-بىلىم بەرۋ جوباسى. ول ولارعا ءبىلىم مەن موتيۆاسيا ارقىلى كۇشتىرەك باستاپقى مۇمكىندىكتەر بەرەدى.