گاس ەسىمدى تيراننوزاۆردىڭ قاڭقاسى اۋكسيوندا رەكوردتىق باعاعا ساتىلىپ، تاريحتاعى ەڭ قىمبات دينوزاۆر سۇيەگى اتاندى. بۇل تۋرالى Kursiv LifeStyle حابارلادى.
قازبا 2021 جىلى وڭتۇستىك داكوتاداعى جەكە مەنشىك جەردەن تابىلدى. وعان قايتىس بولعان جەر يەسى گەري گاس ليكينگتىڭ قۇرمەتىنە گاس ەسىمى بەرىلدى. قازبا جۇمىستارى ءۇش جىلعا سوزىلدى: سۇيەكتەردى تەك توپىراق ەرىگەن جاز ايلارىندا عانا الۋ مۇمكىن بولدى. تاعى ءۇش جىل قاڭقانى قايتا قالپىنا كەلتىرۋگە جۇمسالدى.
بۇل ۇلگى تابىلعانداردىڭ ىشىندەگى ەڭ تولىق جانە ىرىلەرىنىڭ ءبىرى سانالادى: قاڭقانىڭ شامامەن 63%-ى ساقتالعان. قاڭقانىڭ ۇزىندىعى 11،6 مەتر. بۇل ءتۇردىڭ داراقتارى جەر بەتىندە شامامەن 72–66 ميلليون جىل بۇرىن مەكەندەگەن.
بۇرىنعى باعا رەكوردى ستەگوزاۆر اپەكسكە تيەسىلى ەدى. 2024 جىلى ونى قارجىگەر كەن گريففين 44،6 ميلليون دوللارعا ساتىپ العان بولاتىن (بۇل باستاپقى باعادان 11 ەسەگە ارتىق).
گاستىڭ قازبا قالدىقتارى اۋكسيونعا دەيىن 20–30 ميلليون دوللارعا باعالانعان بولاتىن. BBCء-دىڭ حابارلاۋىنشا، لوت ءۇشىن جەتى ساۋداگەر كۇرەسكەن. ساتىپ الۋشى ءوز ەسىمىن جاريالاماۋدى ءجون كورگەن.
ناتيجەسىندە، گاس تيراننوزاۆرى قازىرگى تاڭدا تاريحتاعى ەڭ قىمبات دينوزاۆر اتاندى.
Bloomberg بولسا، دينوزاۆرلاردىڭ فابەرجە جۇمىرتقالارى سياقتى ميللياردەرلەر ءۇشىن مارتەبەلى زاتتارعا اينالعانىن اتاپ وتەدى. بۇل عىلىمعا ءقاۋىپ توندىرەدى: پالەونتولوگتار قازبا باۋىرىمەن جورعالاۋشىلاردىڭ جەكە كوللەكسيالاردا قالىپ قويۋىنان جانە ولاردى زەرتتەۋدىڭ قيىنداۋىنان قاۋىپتەنەدى.
بۇعان دەيىن Kursiv LifeStyle تيراننوزاۆردىڭ قايتا جاسالعان تەرىسىنەن تىگىلگەن سومكەنىڭ جۇزدەگەن مىڭ ەۋروعا اۋكسيوندا ساتىلعانىن جازعان بولاتىن.
تولىعىراق infohub.kz سايتىنان.