قاراتال اۋىلىندا قۇنى 768 ملن تەڭگەدەن اساتىن گاز قۇبىرىنىڭ قۇرىلىسى سوت تالقىسىنا ۇشىرادى: تاپسىرىس بەرۋشى ورىندالعان جۇمىستار مەن جوبالىق قۇجاتتاما اراسىندا سايكەسسىزدىكتەردى انىقتادى. سوت مەردىگەر ۇيىمدى ونداعان ميلليون تەڭگەنى بيۋدجەتكە قايتارۋعا مىندەتتەدى، ال اپەللياسيا شەشىمدى وزگەرىسسىز قالدىردى، دەپ حابارلايدى infohub.kz.
جەتىسۋ وبلىسىنىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى الماتى وبلىسى ەسكەلدى اۋدانى قاراتال اۋىلىندا گاز قۇبىرى مەن گاز تاراتۋ جەلىلەرىن سالۋعا جشس-مەن مەملەكەتتىك ساتىپ الۋ شارتىن جاساستى. جوبانىڭ جالپى قۇنى 768 ملن تەڭگەدەن استى.
تاپسىرىس بەرۋشىنىڭ باستاماسىمەن قۇرىلىس-تەحنيكالىق زەرتتەۋ جۇرگىزىلدى، ول ناقتى ورىندالعان جۇمىستار كولەمى مەن جوبالىق-سمەتالىق قۇجاتتاما اراسىنداعى سايكەسسىزدىكتەردى انىقتادى. اتاپ ايتقاندا، گاز قۇبىرى تىرەكتەرىنىڭ ىرگەتاسىن ورناتۋ كەزىندە مەردىگەر جوبادا كوزدەلگەننەن الدەقايدا از كولەمدە بەتون پايدالانعان.
مامانداندىرىلعان اۋدانارالىق ەكونوميكالىق سوت ءمان-جايدى جان-جاقتى زەردەلەۋ ءۇشىن ساراپشىلاردىڭ قورىتىندىلارىن زەرتتەپ، قۇرىلىس الاڭىندا وبەكتىنى قوسىمشا تەكسەرۋمەن شىعىس وتىرىسىن وتكىزدى. سوت مەردىگەردىڭ جوسپارلانعان كولەمدە جۇمىستاردىڭ ورىندالعانىن راستاي الماعانى، ال تالاپكەردىڭ دالەلدەرى شارتتىق مىندەتتەمەلەردىڭ ءبىر بولىگىنىڭ ورىندالماعانىن كورسەتكەن دەگەن قورىتىندىعا كەلدى.
ءبىرىنشى ساتى سوت تالاپتى ءىشىنارا قاناعاتتاندىردى: مەردىگەر ۇيىمنان رەسپۋبليكالىق بيۋدجەتكە 45،9 ملن تەڭگە جانە 1،4 ملن تەڭگە مەملەكەتتىك باج ءوندىرىلدى. كومپانيانى مەملەكەتتىك ساتىپ الۋدىڭ ادال نيەتتى ەمەس قاتىسۋشىسى دەپ تانۋ تۋرالى تالاپ قابىلدانبادى، ويتكەنى مۇنداي مالىمدەمە ءۇشىن جاعدايلار شارت ورىندالعاننان كەيىن تۋىندادى.
ج ش س اپەللياسيالىق شاعىم بەردى، ءبىراق جامبىل وبلىستىق سوتىنىڭ ازاماتتىق ىستەر جونىندەگى سوت القاسى شەشىمدى وزگەرتۋگە نەگىز تاپپاي، ونى كۇشىندە قالدىردى. سوت اكتىلەرى زاڭدى كۇشىنە ەندى.