جەتىسۋ وبلىسىنداعى سوت 768 ميلليون تەڭگەگە گاز جەلىلەرىن تارتۋعا قاتىستى داۋعا نۇكتە قويدى — ورىنداۋشى كومپانيا جوبادا كورسەتىلگەن قۇرىلىس ماتەريالدارىنىڭ كولەمىن پايدالانۋدى "ۇمىتىپ"، قاۋىپسىزدىك ەسەبىنەن ۇنەمدەۋگە جاقىنداعان. بۇل تۋرالى infohub.kz سايتى حابارلايدى.
جەتىسۋ وبلىسىنىڭ ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى ەسكەلدى اۋدانىنداعى قاراتال اۋىلىندا گاز قۇبىرى مەن تاراتۋ جەلىلەرىن سالۋدى جاۋاپكەرشىلىگى شەكتەۋلى سەرىكتەستىككە تاپسىرىس بەردى.
سوت ءباسپاسوز قىزمەتىنىڭ تۇسىندىرۋىنشە، تاپسىرىس بەرۋشىنىڭ باستاماسىمەن جۇرگىزىلگەن قۇرىلىس-تەحنيكالىق ساراپتاما بارىسىندا ناقتى ورىندالعان جۇمىستار مەن جوبالىق-سمەتالىق قۇجاتتاما اراسىندا سايكەسسىزدىكتەر انىقتالعان. نەگىزگى بۇزۋشىلىق قۇرىلىمنىڭ سەنىمدىلىگىنە قاتىستى: گاز قۇبىرىنىڭ تىرەكتەرىنىڭ ىرگەتاسىن سالۋ كەزىندە مەردىگەر نورمادا كورسەتىلگەننەن الدەقايدا از بەتون قۇيعان.
بۇزۋشىلىقتارعا كوز جەتكىزۋ ءۇشىن مامانداندىرىلعان اۋدانارالىق ەكونوميكالىق سوتتىڭ سۋديالارى تىكەلەي نىساندا كوشپەلى وتىرىس وتكىزىپ، تىرەكتەرگە قوسىمشا تەكسەرۋ جۇرگىزدى.
مەردىگەر جۇمىستاردى تولىق كولەمدە ورىنداعانىن دالەلدەي المادى. ءبىرىنشى ساتىداعى سوت تالاپتى ءىشىنارا قاناعاتتاندىرىپ، سەرىكتەستىكتەن رەسپۋبليكالىق بيۋدجەتكە 45،9 ميلليون تەڭگە جانە 1،4 ميلليون تەڭگە مەملەكەتتىك باج ءوندىردى. سونىمەن قاتار، سوت مەردىگەردى مەملەكەتتىك ساتىپ الۋدىڭ ادال ەمەس قاتىسۋشىسى دەپ تانىمادى، سەبەبى بۇزۋشىلىقتار شارت فورمالدى تۇردە ورىندالعاننان كەيىن عانا انىقتالدى.
فيرما ۇكىمگە شاعىمدانعانىمەن، جامبىل وبلىستىق سوتىنىڭ ازاماتتىق ىستەر جونىندەگى سوت القاسى شەشىمدى وزگەرىسسىز قالدىردى. سوت اكتىلەرى زاڭدى كۇشىنە ەندى.