حالىقارالىق عالىمدار توبى العاش رەت ارتىق تاماقتانۋ ۇستاماسىنان زارداپ شەگەتىن ادامدار مەن ونداي پروبلەماسى جوق ادامداردىڭ گەنومدارىن اۋقىمدى تۇردە سالىستىرىپ، تاماقتانۋ بۇزىلىستارى دەنە سالماعىنىڭ يندەكسىنە تىكەلەي تاۋەلدى ەمەس دەگەن قورىتىندىعا كەلدى، دەپ حابارلايدى infohub.kz سايتى.
"Nature Mental Health" جۋرنالىندا جاريالانعان زەرتتەۋ ناتيجەلەرى كومپۋلسيۆتى ارتىق تاماقتانۋى بار 40 مىڭعا جۋىق ادامنىڭ، انورەكسيامەن اۋىراتىن 25 مىڭ پاسيەنتتىڭ جانە 1،2 ميلليوننان استام ساۋ قاتىسۋشىنىڭ گەنەتيكالىق دەرەكتەرىن تالداۋعا نەگىزدەلگەن. عالىمدار ارتىق تاماقتانۋمەن بايلانىستى گەنومنىڭ التى بولىگىن (لوكۋس) جانە انورەكسيامەن بايلانىستى سەگىز لوكۋسىن انىقتاي الدى.
جۇمىستىڭ باستى قورىتىندىسى — تاماقتانۋ بۇزىلىستارىنىڭ دامۋىنا جاۋاپتى گەنەتيكالىق نۇسقالار ادامنىڭ سالماعىن انىقتايتىن گەندەردەن ەرەكشەلەنەدى. تابىلعان ارتىق تاماقتانۋ لوكۋسىنىڭ ءبىرى بۇرىن جوعارى دەنە سالماعىنىڭ يندەكسىمەن بايلانىستىرىلعان FTO گەنىنىڭ جانىندا ورنالاسقان. اۆتورلاردىڭ پىكىرىنشە، ارتىق تاماقتانۋ بۇل گەننىڭ سالماقتىڭ ارتۋىمەن بايلانىسىن ءىشىنارا تۇسىندىرەدى.
دوكتور حەلەنا دەۆيستىڭ ايتۋىنشا، زەرتتەۋ گەنەتيكالىق دەڭگەيدە تاماقتانۋ مىنەز-قۇلقىنداعى پروبلەمالار تەك دەنە سالماعىنا عانا ساياتىنىن راستايدى. بۇل جاڭالىق گەنەتيكالىق بەيىمدىلىكتى ەسكەرەتىن تاماقتانۋ بۇزىلىستارىن دياگنوستيكالاۋ مەن ەمدەۋدىڭ دالىرەك ادىستەرىن ازىرلەۋگە كومەكتەسۋى مۇمكىن.