قازاقستان باس پروكۋراتۋراسى ازاماتتاردى Apple iPhone 18 سمارتفونىنا الدىن الا تاپسىرىس بەرۋ جانە ونى جويۋعا بايلانىستى جاڭا الاياقتىق سحەمالارى تۋرالى ەسكەرتتى. قىلمىسكەرلەر جاڭا مودەلگە دەگەن قىزىعۋشىلىقتى پايدالانىپ، جالعان حابارلامالار مەن تارتىمدى ۇسىنىستار جىبەرۋدە، دەپ حابارلايدى infohub.kz سايتى.
ءبىرىنشى سحەما بويىنشا، الاياقتار Apple كومپانياسىنىڭ اتىنان iPhone 18-گە الدىن الا تاپسىرىس بەرىلگەنى تۋرالى جالعان حابارلاما جىبەرەدى. ساتىپ الۋدان باس تارتۋ ءۇشىن الۋشىعا «قولداۋ قىزمەتىنە» قوڭىراۋ شالۋ ۇسىنىلادى. الايدا كورسەتىلگەن ءنومىر تىكەلەي قىلمىسكەرلەرگە قوسىلادى، ولار تاپسىرىستى جويۋ سىلتاۋىمەن قۇپيا دەرەكتەردى يەمدەنۋگە جانە ادامدى ءوز نۇسقاۋلارىن ورىنداۋعا كوندىرۋگە تىرىسادى.
ەكىنشى جاعدايدا پايدالانۋشىلارعا سمارتفوندى تارتىمدى باعامەن، جىلدام جەتكىزۋ كەپىلدىگىمەن برونداۋ ۇسىنىلادى. تاپسىرىس بەرۋ سىلتەمەسى بانك كارتاسىنىڭ دەرەكتەرى، قۇپيا سوزدەر جانە باسقا دا قۇپيا اقپارات سۇرالاتىن جالعان سايتقا اپارادى. پروكۋراتۋرانىڭ اتاپ وتۋىنشە، الىنعان مالىمەتتەر تىركەلگىلەر مەن بانك قىزمەتتەرىنە قول جەتكىزۋ، سونداي-اق اقشا قاراجاتىن ۇرلاۋ ءۇشىن پايدالانىلۋى مۇمكىن. الاياقتاردىڭ باستى ايلاسى — ادامدى اسىعىس ارەكەت ەتۋگە ماجبۇرلەۋ: بەيتانىس تاپسىرىستان قورقۋ نەمەسە ءتيىمدى ۇسىنىستان ايىرىلىپ قالۋدان قورقۋ.
ءوزىن قورعاۋ ءۇشىن باس پروكۋراتۋرا كۇدىكتى حابارلامالارداعى سىلتەمەلەرگە وتپەۋگە جانە نومىرلەرگە قوڭىراۋ شالماۋعا؛ بانك كارتالارىنىڭ قۇپيا سوزدەرىن، PIN-كودتارىن، CVV-كودتارىن جانە SMS-تەن راستاۋ كودتارىن حابارلاماۋعا؛ بەيتانىس ادامداردىڭ ءوتىنىشى بويىنشا قوسىمشالاردى ورناتپاۋعا جانە قۇرىلعىعا قول جەتكىزۋگە رۇقسات بەرمەۋگە؛ سايتتىڭ ءتۇپنۇسقالىعىنا جانە ساتۋشىنىڭ سەنىمدىلىگىنە كوز جەتكىزبەيىنشە الدىن الا تولەم جاساماۋعا؛ تاپسىرىستار تۋرالى اقپاراتتى ساتۋشىنىڭ رەسمي سايتى نەمەسە قوسىمشاسى ارقىلى ءوز بەتىنشە اشىپ تەكسەرۋگە كەڭەس بەرەدى.
ەگەر ءسىز كارتا دەرەكتەرىن بەرىپ قويساڭىز نەمەسە كۇدىكتى شەگەرىمدى بايقاساڭىز، دەرەۋ بانككە حابارلاسىپ، كارتانى بۇعاتتاپ، بولعان جاعدايدى پوليسياعا حابارلاۋ قاجەت.