گرۋزيادا مەكتەپتەگى اتىس كەزىندە ۇلى قولدانعان تاپانشانى سىيعا تارتقان ەر ادام 15 جىلعا باس بوستاندىعىنان ايىرىلىپ، جاڭا سوت وتىرىسىن وتكىزۋدى تالاپ ەتتى. بۇل تۋرالى infohub.kz حابارلادى.
كولين گرەي بيىلعى جىلى ەكىنشى دارەجەلى كىسى ءولتىرۋ جانە ابايسىزدا كىسى ءولتىرۋ بويىنشا كىنالى دەپ تانىلعان بولاتىن. سارسەنبىدەگى سوت قۇجاتىندا ونىڭ ادۆوكاتتارى القابيلەردىڭ كىنالى دەگەن ۇكىمى دالەلدەمەلەرمەن راستالماعانىن جانە "زاڭعا، ادىلەتتىلىك پەن تەڭدىك قاعيداتتارىنا قايشى كەلەتىنىن" العا تارتتى.
2024 جىلعى 4 قىركۇيەكتە اپالاچي جوعارى مەكتەبىندە بولعان اتىستا ەكى وقۋشى مەن ەكى ءمۇعالىم قازا تاپتى. ونىڭ ۇلى كولت گرەي ءومىر بويىنا باس بوستاندىعىنان ايىرىلىپ، كەشىرىم جاساۋ قۇقىعىنسىز سوتتالدى.
كولين گرەي — بالالارى اتىس وقيعاسىنا قاتىسى بار دەپ ايىپتالعاننان كەيىن قىلمىستىق جاۋاپكەرشىلىككە تارتىلعان بىرنەشە امەريكاندىق اتا-انانىڭ ءبىرى. پروكۋرورلاردىڭ ايتۋىنشا، كولين گرەي ۇلىنا جارتىلاي اۆتوماتتى ۆينتوۆكانى روجدەستۆو سىيلىعى رەتىندە، وق-دارىلەرمەن جانە باسقا دا اتىس قۇرالدارىمەن بىرگە بەرگەن.
ناۋرىزدا القابيلەر كولين گرەيدى ەكى 14 جاستاعى وقۋشى — مەيسون شەرمەرحورن مەن كريستيان انگۋلونىڭ ولىمىنە اكەلگەن ەكىنشى دارەجەلى كىسى ولتىرۋدە كىنالى دەپ تاپتى. گرۋزيا زاڭى بويىنشا، ەكىنشى دارەجەلى كىسى ءولتىرۋ — بالاعا قاتىگەزدىك جاساۋ قىلمىسى ارقىلى بالانىڭ ولىمىنە اكەلۋ. سونداي-اق گرەي 39 جاستاعى ءمۇعالىم ريچارد اسپينۆولل مەن 53 جاستاعى كريستينا يريميەنىڭ ولىمىنە اكەلگەن ابايسىزدا كىسى ولتىرۋدە كىنالى دەپ تانىلدى. مەكتەپ اتلانتادان 45 ميل (70 شاقىرىم) سولتۇستىك-شىعىستا ورنالاسقان.