گەرمانيادا مەتالل ىزدەگىشى بار اۋەسقوي ارحەولوگ 934 ريم كۇمىس مونەتاسىنان تۇراتىن ۇلكەن قازىنا تاپتى، دەپ حابارلايدى infohub.kz سايتى.
سولتۇستىك رەين-ۆەستفاليا جەرىندە يمپەراتور ادريان داۋىرىنەن قالعان قويما تابىلدى. ول ريم يمپەرياسى تاريحىنىڭ شامامەن 300 جىلىن قامتيدى، دەپ جازادى Smithsonian magazine. گەرمانيادا كولننىڭ وڭتۇستىگىندە ورنالاسقان ۆەسسەلينگ قالاسىنىڭ ماڭىنان ريم كۇمىس مونەتالارىنىڭ ەڭ ۇلكەن قازىنالارىنىڭ ءبىرى تابىلدى. ونى سولتۇستىك رەين-ۆەستفاليا جەرى بيلىگىنىڭ رەسمي رۇقساتىمەن القاپتى مەتالل ىزدەگىشپەن زەرتتەگەن اۋەسقوي ارحەولوگ وليۆەر ريدل تاپتى.
العاشقى 15 مونەتانى تاپقان سوڭ ريدل رەينلاند ارحەولوگيالىق ەسكەرتكىشتەرىن قورعاۋ باسقارماسىنا (LVR) حابارلادى. كەلگەن ماماندار توپىراقتىڭ ءبىر بولىگىن ىشىندەگىسىمەن بىرگە الىپ، بوننداعى LVR-LandesMuseum مۇراجايىنىڭ رەستاۆراسيا شەبەرحاناسىنا جىبەردى. رەنتگەن سۋرەتتەرى مەن كەيىنگى قازبا جۇمىستارى سالماعى شامامەن ءۇش كيلوگرامم قازىنا 934 كۇمىس دەناريدەن تۇراتىنىن كورسەتتى. ولارمەن بىرگە ساراپشىلار كەراميكالىق ىدىستىڭ سىنىقتارىن جانە قىش قۇمىرا اۋىل شارۋاشىلىعى جۇمىستارىنان زاقىمدالعانعا دەيىن اقشا ساقتالعان ساباننىڭ ىزدەرىن تاپتى.
جيناقتاعى ەڭ جاڭا مونەتا ءبىزدىڭ ءداۋىرىمىزدىڭ 124–125 جىلدارىمەن داتالانادى، بۇل يمپەراتور ادرياننىڭ بيلىك كەزەڭىنە سايكەس كەلەدى، ال ەڭ كونەسى ريم رەسپۋبليكاسى ءداۋىرىنىڭ ءبىزدىڭ داۋىرىمىزگە دەيىنگى 148 جىلىنا جاتادى. تابىلعان قازىنانىڭ جالپى سوماسى سول كەزدەگى قاتارداعى ريم لەگيونەرىنىڭ شامامەن التى جىلدا جيناعان جالاقىسىنا تەڭ. LVR باسقارماسىنىڭ ديرەكتورى ەريح كلاسسەن اتاپ وتكەندەي، يەسى ساقتىق ءۇشىن جيناعان اقشاسىن كومىپ، قويمانى الۋعا ۇلگەرمەي قازا تاپقان بولۋى مۇمكىن. قازىرگى تاڭدا تابىلعان قازىنا بونن مۇراجايىندا قويىلعان.