گەرمانيانىڭ شۆەدت قالاسىنداعى مۇناي وڭدەۋ زاۋىتىنا بۇرىن قازاقستاننان شيكىزات جەتكىزىلەتىن ەدى، ەندى وڭتۇستىك امەريكادان بالاما جەتكىزىلىمگە كوشتى، دەپ حابارلايدى infohub.kz.
پولشانىڭ UNIMOT Paliwa كومپانياسى شىلدە ايىندا العاش رەت گدانسكتان شۆەدتكە وڭتۇستىك امەريكادان مۇناي پارتياسىن جىبەرگەنىن مالىمدەدى. قاي ەل ەكەنى ناقتىلانبادى. بۇل جەتكىزىلىم رەسەيدىڭ شەكتەۋلەرىنە بايلانىستى گەرمانياعا ەندى كەلمەيتىن قازاق شيكىزاتىن الماستىرۋعا ارنالعان.
«وسى جىلدىڭ مامىر ايىندا «درۋجبا» قۇبىرى ارقىلى قازاق شيكىزاتىن جەتكىزۋ توقتاتىلعاننان كەيىن شۆەدتتەگى مۇناي وڭدەۋ زاۋىتى UNIMOT توبىنىڭ قولداۋىمەن وڭتۇستىك امەريكادان قوسىمشا مۇناي پارتياسىن جىبەرۋ تۋرالى كەلىسىمگە كەلدى. بۇل جەتكىزىلىم شىعىس گەرمانيا مەن باتىس پولشانىڭ وتىن قاۋىپسىزدىگىن ايتارلىقتاي نىعايتادى»، – دەلىنگەن كومپانيا مالىمدەمەسىندە.
پولشا جەتكىزۋشىسىنىڭ ايتۋىنشا، بەرلين مەن براندەنبۋرگتەگى كولىكتەردىڭ 90 پايىزى شۆەدت زاۋىتىنىڭ وتىنىمەن جۇرەدى، ال پولشا جىل سايىن زاۋىتتان شامامەن ەكى ميلليون توننا مۇناي ونىمدەرىن الادى.
رەسەي 1 مامىردان باستاپ قازاق مۇنايىنىڭ ءوز اۋماعى ارقىلى شۆەدت زاۋىتىنا ءترانزيتىن توقتاتتى. تاريحي تۇرعىدان زاۋىت رەسەيلىك شيكىزاتتى وڭدەۋگە بەيىمدەلگەن ەدى، ءبىراق رەسەيدىڭ ۋكرايناعا باسىپ كىرۋىنەن كەيىن كاسىپورىن گەرمانيا بيلىگىنىڭ سەنىمگەرلىك باسقارۋىنا بەرىلىپ، وعان نەگىزگى شيكىزات كوزى قازاقستان مۇنايى بولدى. رەسەي تاراپىنان ءترانزيتتىڭ توقتاتىلۋى تەحنيكالىق اقاۋلار مەن «درۋجبا» ينفراقۇرىلىمىنا ۇشقىشسىز ۇشۋ اپپاراتتارىنىڭ شابۋىلدارىمەن بايلانىستىرىلدى، ءبىراق كەيبىر ساراپشىلار مۇنى كرەملدىڭ ساياسي ويىنىنىڭ ءبىر بولىگى دەپ سانادى.
ترانزيت توقتاتىلار الدىندا قازاقستان شۆەدت زاۋىتىنا 290 مىڭ توننا مۇناي جىبەرىپ ۇلگەردى. جالپى، 2026 جىلدىڭ ءتورت ايىندا قازاقستاننان گەرمانياعا جەتكىزىلىم كولەمى ەكى ەسەگە جۋىق ءوستى.