قازاقستاندا گيدتەر، ەكسكۋرسوۆودتار جانە تۋريزم نۇسقاۋشىلارىنىڭ قىزمەتىنىڭ ءبىرىڭعاي قاعيدالارى بەكىتىلدى. جاڭا قۇجات تۋريستىك سالا وكىلدەرىنىڭ جۇمىسىنا ءبىرىڭعاي تالاپتار بەلگىلەپ، ساياحات قاۋىپسىزدىگىن ارتتىرۋعا باعىتتالعان، دەپ حابارلايدى infohub.kz.
قاعيدالار مامانداردىڭ وكىلەتتىكتەرىن ايقىنداپ، ولاردىڭ تۋريستەرگە دۇرىس اقپارات بەرۋى، مارشرۋتتاردا سۇيەمەلدەۋى جانە قاۋىپسىزدىك تالاپتارىن ساقتاۋى ءۇشىن جاۋاپكەرشىلىگىن بەكىتەدى. سونىمەن قاتار، قۇجات گيدتەر، ەكسكۋرسوۆودتار جانە تۋريزم نۇسقاۋشىلارىنىڭ فۋنكسيالارىن اجىراتادى.
كاسىبي قىزمەتتى باستاۋ ءۇشىن ماماندار قازاقستان رەسپۋبليكاسىنىڭ ازاماتتىعىنا يە بولىپ، رۇقساتتار مەن حابارلامالار تۋرالى زاڭناما اياسىندا eLicense.kz پورتالى ارقىلى ءتيىستى حابارلاما جىبەرۋى قاجەت. بۇدان ءارى ولارعا جۇمىستىڭ ۇيىمداستىرۋ-قۇقىقتىق نىسانىن ءوز بەتىنشە تاڭداۋ مۇمكىندىگى بەرىلەدى. سونداي-اق، گيدتەر، ەكسكۋرسوۆودتار جانە تۋريزم نۇسقاۋشىلارىنىڭ قىزمەتىن ءوزىن-وزى جۇمىسپەن قامتىعاندار تىزبەسىنە ەنگىزۋ قاراستىرىلۋدا.
حابارلامالار نەگىزىندە مينيسترلىك تۋريستىك سالا ماماندارىنىڭ مەملەكەتتىك ەلەكتروندىق ءتىزىلىمىن قالىپتاستىرادى. تۋريستەر ونىمەن تۋريزم جانە سپورت مينيسترلىگى مەن «Kazakh Tourism» ۇك» اق-نىڭ رەسمي رەسۋرستارىندا تانىسا الادى، بۇل بەلگىلەنگەن تالاپتارعا سايكەس جۇمىس ىستەيتىن كاسىبي مامانداردىڭ قىزمەتىن تاڭداۋعا مۇمكىندىك بەرەدى.
قاعيدالاردىڭ جەكە ءبولىمى قاۋىپسىزدىككە ارنالعان. ماماندار ساياحاتشىلاردى مارشرۋتتاردىڭ ەرەكشەلىكتەرى، ىقتيمال تاۋەكەلدەر جانە نىسانداردان ءوتۋ شارتتارى تۋرالى الدىن الا حاباردار ەتۋگە مىندەتتى. توتەنشە جاعدايلار كەزىندە ۋاكىلەتتى ورگاندار مەن تۋريستەردىڭ تۋىستارىن جەدەل حابارلاندىرۋ كوزدەلگەن.
قاۋىپتىلىگى جوعارى مارشرۋتتار ءۇشىن ءتۋريستىڭ ىقتيمال تاۋەكەلدەرمەن تانىسقانى تۋرالى مىندەتتى جازباشا راستاۋ ەنگىزىلەدى.