«گودزيللا: مينۋس ءبىر» وسكارلى جاپون ءفيلمىنىڭ كوپتەن كۇتكەن جالعاسىنىڭ الەمدىك تۇساۋكەسەرى 64ء-شى نيۋ-يورك كينوفەستيۆالىنىڭ Spotlight Gala گالا-باعدارلاماسىنىڭ باستى وقيعاسى بولادى، دەپ حابارلايدى infohub.kz سايتى.
بەلگىلى كينوفەستيۆال ۇيىمداستىرۋشىلارى رەجيسسەر تاكاسي ياماساكيدىڭ ءفيلمىنىڭ كورسەتىلىمى 26 قىركۇيەكتە Alice Tully Hall زالىندا وتەتىنىن مالىمدەدى. رەجيسسەر، سەناريست جانە ۆيزۋالدى ەففەكتتەر مامانى ءفيلمدى اكتەرلىك قۇرام جانە ءتۇسىرۋ توبىمەن بىرگە جەكە ءوزى تانىستىرادى.
جاڭا ءفيلمنىڭ وقيعاسى 1949 جىلى — ءبىرىنشى ءبولىمنىڭ فينالىنان ەكى جىل وتكەن سوڭ ءوربيدى. سيۋجەت ورتالىعىندا تاعى دا سيكيسيما وتباسى — ەكىنشى دۇنيەجۇزىلىك سوعىستان كەيىن ءومىرىن قالپىنا كەلتىرۋگە تىرىسىپ، الىپ قۇبىجىقتىڭ جاڭا قاۋپىنە تاپ بولعان وتباسى. فەستيۆالدىڭ كوركەمدىك ديرەكتورى دەننيس ليمانىڭ ايتۋىنشا، فيلم تەرەڭ ادامدىق دراماسى بار كلاسسيكالىق بلوكباستەر رۋحىن ساقتايدى.
الدىڭعى ءبولىم «گودزيللا: مينۋس ءبىر» الەمدىك پروكاتتا 116 ميلليون دوللار جيناپ، ياماساكيگە ۇزدىك ۆيزۋالدى ەففەكتتەر ءۇشىن «وسكار» سىيلىعىن اكەلدى. جالعاسىنىڭ جاپونيادا كەڭ پروكاتقا شىعۋى 3 قاراشاعا جوسپارلانعان، ال سولتۇستىك امەريكادا كورسەتىلىم 6 قاراشادا باستالادى.