شەتەلدىك ماركەتپلەيستەر، الەۋمەتتىك جەلىلەر، ستريمينگتىك جانە باسقا دا سيفرلىق سەرۆيستەر 2022 جىلدان بەرى قازاقستان بيۋدجەتىنە «Google سالىعى» دەپ اتالاتىن 178،8 ملرد تەڭگە اۋداردى. تەك 2026 جىلدىڭ العاشقى جەتى ايىندا تۇسىمدەر 51،5 ملرد تەڭگەگە جەتتى – بۇل مەملەكەتتىڭ وتكەن جىلعى بارلىق تۇسىمىمەن بىردەي دەرلىك، دەپ حابارلايدى infohub.kz سايتى.
«Google سالىعى» دەپ شەتەلدىك كومپانيالاردىڭ قازاقستاندىقتارعا ينتەرنەت ارقىلى تاۋار ساتۋى جانە ەلەكتروندىق قىزمەت كورسەتۋى كەزىندە تولەيتىن ققس-ىن اتايدى.
ءقازىر قازاقستاندا وسىنداي ققس تولەۋشى 133 شەتەلدىك كومپانيا تىركەلگەن. ولاردىڭ قاتارىندا Apple، Amazon، Alibaba جانە ونىمەن بايلانىستى الاڭدار، AliExpress، Google، Meta، Microsoft، Netflix، OpenAI، Ozon، Temu، TikTok، Samsung، Sony جانە باسقا دا ءىرى شەتەلدىك كومپانيالار بار.
2025 جىلى شەتەلدىك ينتەرنەت-كومپانيالار قازاقستان بيۋدجەتىنە 57،6 ملرد تەڭگە اۋداردى. ەڭ ءىرى تولەۋشى سينگاپۋردا تىركەلگەن، Temu ماركەتپلەيسىمەن بايلانىستى Elementary Innovation Pte. Ltd. بولدى. كومپانيا 13،3 ملرد تەڭگە تولەدى.
ودان كەيىن Apple – 11،2 ملرد تەڭگە جانە Steam ويىن پلاتفورماسىنا يە Valve – 10،3 ملرد تەڭگە تۇر.
Google قازاقستانعا تاعى 7،3 ملرد تەڭگە، ال iHerb ينتەرنەت-دۇكەنى 4،9 ملرد تەڭگە اۋداردى. العاشقى وندىققا Meta، TikTok، AliExpress جانە باسقا دا شەتەلدىك ينتەرنەت-دۇكەندەر ەندى.
وسىلايشا، اتالعان بەس ءىرى كومپانيا عانا 47 ملرد تەڭگە، ياعني 2025 جىلعى شەتەلدىك سيفرلىق بيزنەستەن تۇسكەن بارلىق ءتۇسىمنىڭ 80%-دان استامىن اۋداردى.
باسقا تانىمال سەرۆيستەردىڭ ىشىندە ەڭ ءىرى تولەۋشى Netflix بولدى – 2025 جىلدىڭ قورىتىندىسى بويىنشا ستريمينگتىك پلاتفورما 353،9 ملن تەڭگە اۋداردى.
Spotify 293،1 ملن تەڭگە، Zoom – 183،2 ملن تەڭگە، Nintendo – 54 ملن تەڭگە، ءبىلىم بەرۋ پلاتفورماسى Coursera – 33،2 ملن تەڭگە تولەدى. Samsung Electronics كورسەتكىشى 9 ملن تەڭگە، ال IMDb.com – 375،7 مىڭ تەڭگە بولدى.
ءتورت جىل ىشىندە شەتەلدىك ينتەرنەت-كومپانيالاردان تۇسەتىن تۇسىمدەر بىرنەشە ەسە ءوستى. 2022 جىلى بيۋدجەت ولاردان 10،4 ملرد تەڭگە السا، 2023 جىلى – 24،3 ملرد تەڭگە، ال 2024 جىلى – 35 ملرد تەڭگە بولدى. 2025 جىلى سوما 57،6 ملرد تەڭگەگە جەتتى. تاعى 51،5 ملرد تەڭگە 2026 جىلدىڭ باسىنان 1 تامىزعا دەيىن ءتۇستى.
اعىمداعى جىلدىڭ جەتى ايىندا شەتەلدىك سيفرلىق كومپانيالار 2025 جىلعى سومانىڭ شامامەن 89%-ىن تولەدى. ەگەر قازىرگى ديناميكا ساقتالسا، جىل قورىتىندىسى بويىنشا تۇسىمدەر جاڭا ماكسيمۋمعا جەتۋى مۇمكىن.