قازاقستاندا تۋىستارىنا ادامنىڭ قيىن جاعدايعا تاپ بولعانىن جەدەل بىلۋگە كومەكتەسەتىن تەگىن قىزمەت پايدا بولدى. ماسەلەن، ەگەر قازاقستاندىق اپاتقا ۇشىراسا نەمەسە شۇعىل تۇردە اۋرۋحاناعا تۇسسە، ونىڭ وتباسىنا SMS كەلەدى. الايدا جۇيە جۇمىس ىستەۋى ءۇشىن eGov Mobile قوسىمشاسىندا سەنىمدى بايلانىستاردى الدىن الا تىركەۋ قاجەت، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىنىڭ مالىمەتىنشە، «گوسپيتاليزاسيا جاعدايىندا حابارلاۋ ءۇشىن سەنىمدى بايلانىستاردى تىركەۋ» جاڭا قىزمەتى قوسىمشادا پايدا بولدى. ءسىز گوسپيتاليزاسيالانعان جاعدايدا حابارلاما جىبەرىلەتىن ءۇش سەنىمدى تۇلعاعا دەيىن كورسەتە الاسىز.
سونىمەن، eGov.kz پورتالىندا: اۆتوريزاسيادان ءوتۋ؛ «گوسپيتاليزاسيا جاعدايىندا حابارلاۋ ءۇشىن سەنىمدى بايلانىستاردى تىركەۋ» قىزمەتىن تاڭداۋ؛ سەنىمدى تۇلعانىڭ ءجسن-ىن كورسەتۋ قاجەت.
سەنىمدى تۇلعالار رەتىندە تەك 18 جاستان اسقان، سونداي-اق ءموبيلدى ازاماتتار بازاسىندا تىركەلگەن قازاقستاندىقتار عانا بولا الاتىنى اتاپ وتىلەدى.
«وسىدان كەيىن پايدالانۋشى جەكە دەرەكتەردى وڭدەۋگە جانە دەنساۋلىق جاعدايى تۋرالى مالىمەتتەردى بەرۋگە كەلىسىمىن راستاپ، سۇرانىس جىبەرەدى. كورسەتىلگەن ادامعا تىركەۋدى راستاۋ نەمەسە قابىلداماۋ ۇسىنىسىمەن SMS كەلەدى»، – دەلىنگەن حابارلامادا.
راستاۋ ءۇشىن 911 كودى بار جاۋاپ SMS جىبەرۋ قاجەت، باس تارتۋ ءۇشىن – 912. شەشىم قابىلداۋعا بەس ساعاتقا دەيىن ۋاقىت بەرىلەدى.
eGov Mobile ءموبيلدى قوسىمشاسىنا كەلەتىن بولساق، بۇل جەردە قىزمەت «مەملەكەتتىك قىزمەتتەر» – «دەنساۋلىق ساقتاۋ» بولىمىندە ورنالاسقان.
«پايدالانۋشىعا سەنىمدى بايلانىستاردى تىركەۋ قىزمەتىن تاڭداپ، ۇقساس پروسەدۋرادان ءوتۋ قاجەت. ءوتىنىشتى اقپاراتتىق جۇيەدە وڭدەۋ 10 مينۋتقا دەيىن ۋاقىت الادى»، – دەلىنگەن حابارلامادا.
تىركەلۋدىڭ اعىمداعى مارتەبەسى eGov.kz پورتالىندا «مەنىڭ ءپروفيلىم – جەكە كابينەت» بولىمىندە، ال eGov Mobile-دا «حابارلامالار – جەكە كابينەت تاريحى» بولىمىندە كورسەتىلەدى.