گرەكيانىڭ وڭتۇستىگىندەگى Epidaurus قالاسىنداعى ەجەلگى اشىق اسپان استىنداعى تاس تەاتردا 22 اكتەر قاتىسقان «ترويان ايەلدەرى» قويىلىمى ءوتتى. بۇل — وسى 2300 جىلدىق تاريحى بار تەاترداعى العاشقى تولىق قولجەتىمدى قويىلىم بولدى، دەپ حابارلايدى infohub.kz سايتى.
كريستوفەر نولاننىڭ «وديسسەيا» ءفيلمى گومەرگە دەگەن قىزىعۋشىلىقتى جاڭعىرتىپ جاتقاندا، گرەكيادا مۇگەدەك جانە قالىپتى اكتەرلەر سوعىستىڭ ەكىنشى جاعىن — ورالعان باتىرلاردىڭ جەڭىسىن ەمەس، ولاردىڭ ارتىندا قالعان ازاپتى كورسەتتى. ەجەلگى گرەك دراماتۋرگى ەۆريپيد ترويا قيراندىلارى مەن قۋعىنعا ۇشىراعان ايەلدەردىڭ تاعدىرىن جازعان.
2 تامىزداعى قويىلىمدا سوقىر كورەرمەندەرگە برايل قارپىمەن جازىلعان باعدارلامالار، تاكتيلدى ماكەتتەر جانە اۋديوسيپاتتاما ۇسىنىلسا، ساڭىراۋ كورەرمەندەر جوعارىداعى جازۋلار ارقىلى قاداعالاي الدى. سونىمەن قاتار، سايت بويىنشا جۇرۋگە ارنالعان فيزيكالىق بەيىمدەۋلەر جاسالدى.
پاراليمپيادا چەمپيونى گرەگ پوليحرونيديس بۇل قويىلىمدى «تەڭدىك مەرەكەسى» دەپ اتاپ، ونى ۇلگى ەتۋ كەرەكتىگىن ايتتى. ال 58 جاستاعى مۇگەدەكتەر ارباسىنداعى اكتريسا يريني كۋرۋۆاني بۇل تەاترعا العاش رەت كەلگەنىن، جۇرەگىنىڭ وسى تەاترداي اشىلىپ جاتقانىن سەزىنگەنىن جەتكىزدى. سوقىر پسيحولوگ يواننا-ماريا گەرسۋ دە ءوزىنىڭ باعدارلاۋشى يتىمەن بىرگە قويىلىمعا قاتىسىپ، تەڭ دارەجەدە ونەردەن ءلاززات الۋعا قۇقىعى بارىن اتاپ ءوتتى.
قويىلىمدى گرەكيانىڭ ۇلتتىق تەاترى ساحنالادى، ال قولجەتىمدىلىك قىزمەتتەرىن Liminal قوعامدىق قورى Alpha Bank قارجىلاي قولداۋىمەن جاسادى. ۇلتتىق تەاتردىڭ كوركەمدىك جەتەكشىسى ارگيرو حيوتي بۇل قويىلىم ەرەجەگە اينالۋى كەرەك ەكەنىن، ءبىراق بۇل كۇردەلى ءارى قىمبات پروسەسس ەكەنىن، الايدا ءىرى ساحنالار مەن تەاترلار وسى دەڭگەيگە جەتۋى قاجەتتىگىن ايتتى.