گرەسيادا ورمان ءورتىن ءسوندىرۋ كەزىندە ەكى تىكۇشاق سوقتىعىسىپ، ەكيپاج مۇشەلەرى جاراقات الدى. استانادان باتىسقا قاراي 65 شاقىرىم جەردەگى پساتا ماڭىندا بولعان وقيعانىڭ ۆيدەوسىندا ءبىر تىكۇشاق ەكىنشىسىنىڭ قالاقتارىنا سوعىلىپ، ول جالىنعا ورانعانى كورىنەدى. ەكەۋى دە جارتاسقا قۇلاعان. گرەكيا باق-تىڭ حابارلاۋىنشا، ءتورت ەكيپاج مۇشەسىنىڭ ەكەۋى ەسىن جوعالتقان كۇيى تابىلسا، قالعاندارى جەڭىل جاراقات العان.
بۇل اپتادا گرەسيادا بىرنەشە ءورت وشاعى پايدا بولىپ، كوپتەگەن ادام ۇيلەرىن تاستاپ كەتۋگە ءماجبۇر بولدى. قاتتى جەل ءورتتى اۋىزدىقتاۋ جۇمىستارىن قيىنداتىپ تۇر. بىرنەشە ەۋروپالىق ەل دە ىستىق تولقىنداردىڭ سالدارىنان جويقىن ورمان ورتىنەن زارداپ شەكتى. اپتا باسىندا فرانسيا مەن يسپانيادا ءىرى ورتتەر بولدى - ولاردىڭ ەكەۋى دە مادريد پەن بوردوعا جاقىن ماڭدا ورىن العان ەدى. ءقازىر ولار اۋىزدىقتالعانىمەن، ءالى دە جانىپ تۇر. ەۆاكۋاسيالانعان 300 مىڭعا جۋىق ادام ۇيلەرىنە قايتا ورالا باستادى.
گرەكيادا ب ا ق پورتو-گەرمەنو، پساتا، فوكيدا، مەگارا جانە كەفالونيانى قامتيتىن اۋماقتا «تيتانيكالىق شايقاس» ءجۇرىپ جاتقانىن حابارلايدى. وندا 500-دەن استام ءورت ءسوندىرۋشى سوڭعى 72 ساعات بويى جاعدايدى باقىلاۋعا الۋعا تىرىسۋدا. اۋەدەگى سوقتىعىسۋ «پساتا اۋدانىنداعى ورمان ءورتىن ءسوندىرۋ وپەراسياسى كەزىندە» بولعانىن ءورت ءسوندىرۋ دەپارتامەنتى مالىمدەدى. گرەكيا باق-تىڭ اقپاراتىنشا، ەكيپاج مۇشەلەرى - ەكى گرەك جانە ەكى رۋمىن - 251ء-شى اسكەري-اۋە كۇشتەرىنىڭ باس گوسپيتالىنە جەتكىزىلگەن.
ورمان ورتتەرىنىڭ كوپشىلىگى ادامداردىڭ قاساقانا نەمەسە ابايسىز ارەكەتىنەن پايدا بولادى، ءبىراق كليماتتىڭ وزگەرۋى مۇنداي جاعدايلاردى جيىلەتىپ وتىر. وتكەن قىس جۇمساق ءارى ىلعالدى بولىپ، وسىمدىكتەردىڭ وسۋىنە ىقپال ەتتى، ال كەيىنگى ىستىق كەزەڭدەردە ولار قۋراپ، ورتكە جانارمايعا اينالدى.