12 جىلدىق كۇتۋدەن كەيىن، ەجەلگى گرەك قۇدايلارىنىڭ اڭىزعا اينالعان مەكەنى وليمپ تاۋى يۋنەسكو-نىڭ دۇنيەجۇزىلىك مۇرا تىزىمىنە ەنگىزىلدى. بۇل تۋرالى infohub.kz سايتى حابارلايدى.
گرەكياداعى ەڭ بيىك تاۋ – وليمپ – ءوزىنىڭ مادەني جانە تابيعي ماڭىزى ءۇشىن ارالاس دۇنيەجۇزىلىك مۇرا نىسانى رەتىندە تىركەلدى. بۇل شەشىم وڭتۇستىك كورەيانىڭ پۋسان قالاسىندا وتكەن يۋنەسكو كوميتەتىنىڭ وتىرىسىندا قابىلداندى. وليمپ تاۋى تەڭىز دەڭگەيىنەن 2918 مەتر بيىكتىكتە ورنالاسقان جانە 2014 جىلدان بەرى الدىن الا تىزىمدە بولعان.
گرەكيانىڭ يۋنەسكو-داعى دەلەگاسياسىنىڭ باسشىسى گەورگيوس كۋمۋساكوس بۇل شەشىم نىساننىڭ ساقتالۋىن قامتاماسىز ەتەتىنىن اتاپ ءوتتى. «وليمپ تاۋىن قازىرگى جانە بولاشاق ۇرپاقتار ءۇشىن قورعاۋ – ءبىزدىڭ مىزعىماس مىندەتىمىز»، – دەدى ول. ايماق اكىمى ەۆانگەلوس گەروليوليوس جەرگىلىكتى ورتانى، اسىرەسە ونىڭ ەرەكشە بيوالۋانتۇرلىلىگىن قورعاۋ ءۇشىن جاۋاپكەرشىلىك ارتاتىنىن ايتتى.
وليمپ تاۋىمەن قاتار، فرانسياداعى ەكىنشى دۇنيەجۇزىلىك سوعىس كەزىندەگى د-كۇن دەسانتىنىڭ جاعاجايلارى، جاپونيانىڭ ەجەلگى استانالارى اسۋكا مەن فۋدزيۆارا، سونداي-اق وڭتۇستىك سۋداننىڭ بوما-بادينگيلو لاندشافتى دا تىزىمگە ەنگىزىلدى. بۇل – شىعىس افريكا ەلى ءۇشىن العاشقى دۇنيەجۇزىلىك مۇرا نىسانى.
فرانسيانىڭ يۋنەسكو-داعى تۇراقتى دەلەگاتى احلەم گاربي حالىقارالىق شيەلەنىس جاعدايىندا بۇل شەشىمنىڭ ەرەكشە ماڭىزى بار ەكەنىن اتاپ ءوتتى. نورمانديا ايماعىنىڭ پرەزيدەنتى ەرۆە مورەن تىزىمگە ەنۋ ءفاشيزمدى جەڭۋ ءۇشىن قۇربان بولعان ساربازداردىڭ ەرەن ەڭبەگىن مويىنداۋ دەپ باعالادى.
يۋنەسكو كوميتەتىنىڭ سارسەنبىدە اياقتالاتىن جىلدىق وتىرىسىندا 30-عا جۋىق ۇمىتكەر قارالادى. تابىستى بولعاندار 170 ەلدەگى 1248 نىسانعا قوسىلادى. مۇرا نىساندارى حالىقارالىق كونۆەنسيا اياسىندا ساقتاۋعا، كەڭەس بەرۋگە جانە قارجىلاي قولداۋعا يە بولادى.
وليمپ تاۋىنىڭ تىزىمگە ەنۋىنە بايلانىستى گرەك شەنەۋنىكتەرى بۇل شەشىمدى ودان ءارى كەشىكتىرۋ بەلگىلەرىنە قاراماستان ەرەكشە قۋانىشپەن قارسى الدى. وتىرىستىڭ الدىن الا كۇن تارتىبىندە وليمپ ءىسى قوسىمشا مالىمەتتەر ءۇشىن گرەكياعا قايتارىلۋى مۇمكىن دەگەن بەلگى بولعان، الايدا بۇل قورقىنىش اقتالمادى، ۇمىتكەر ءبىراۋىزدان قولداۋ تاپتى.