اۋقىمدى بلەكاۋت گرۋزيانى تۇرالاتتى – استانا ءتبيليسيدى قوسا العاندا، ەلدىڭ كوپ بولىگى جارىقسىز قالدى. توتەنشە وقيعانىڭ سەبەپتەرى ازىرگە انىقتالىپ جاتىر، دەپ حابارلايدى infohub.kz.
جەرگىلىكتى بۇقارالىق اقپارات قۇرالدارىنىڭ مالىمەتىنشە، ەلەكتر قۋاتىنىڭ ءوشىرىلۋى ەل اۋماعىنىڭ كوپ بولىگىن قامتىعان. ءارتۇرلى وڭىرلەردەن الەۋمەتتىك جەلى قولدانۋشىلارى جارىقتىڭ جوعالعانى تۋرالى حابارلاعان. بۇل اقپاراتتى باتۋمي، سونداي-اق گۋريا، سامەگرەلو، راچا جانە اسكەري-گرۋزين جولىنا جاقىن ورنالاسقان دۋشەتي تۇرعىندارى راستادى.
تبيليسيدە ورتالىق كوشەلەردە باعدارشامدار مەن كوشە جارىقتاندىرۋلارى جۇمىس ىستەمەي قالدى، بۇل كولىك قوزعالىسى مەن جاياۋ جۇرگىنشىلەرگە ۇلكەن قيىندىق تۋعىزدى.
بولجام بويىنشا، اۋقىمدى اقاۋدىڭ سەبەبى ەلەكتر ستانسيالارىنىڭ بىرىندەگى ءىرى اپات بولۋى مۇمكىن. ناقتى جاعدايلار تۋرالى رەسمي تۇسىنىكتەمەلەر ازىرگە تۇسكەن جوق.
كەيىنىرەك گرۋزيانىڭ مەملەكەتتىك ەلەكتر جۇيەسى ەلەكترمەن جابدىقتاۋدى كەزەڭ-كەزەڭىمەن قالپىنا كەلتىرە باستاعانىن حابارلادى. «بۇكىل ەل بويىنشا ەلەكترمەن جابدىقتاۋدى قالپىنا كەلتىرۋ كەزەڭ-كەزەڭىمەن جالعاسۋدا. قازىرگى ۋاقىتتا تبيليسيدە – ديدۋبە، ۆاكە، متاسميندا جانە كرسانيسي اۋداندارىندا ەلەكتر قۋاتى ءىشىنارا قالپىنا كەلتىرىلدى. سونداي-اق كۋتايسي، چياتۋرا، ساچحەرە، وني جانە امبرولاۋري قالالارىنىڭ ءبىر بولىگىندە ەلەكترمەن جابدىقتاۋ قالپىنا كەلتىرىلدى»، – دەپ مالىمدەدى ۆەدومستۆو.