2026 جىلعى 1 قىركۇيەكتەن باستاپ گرۋزيادا شەتەلدىكتەرگە قاتىستى ەڭبەك ەرەجەلەرى قاتاڭدادى: ەندى زاڭسىز جۇمىس ىستەگەندەر ەلدەن شىعارىلۋى، اكىمشىلىك ايىپپۇل سالىنۋى نەمەسە ەكى جىلدان بەس جىلعا دەيىن ەلگە كىرۋگە تىيىم سالىنۋى مۇمكىن. بۇل تۋرالى قازاقستان رەسپۋبليكاسىنىڭ سىرتقى ىستەر مينيسترلىگى ەسكەرتتى، دەپ حابارلايدى infohub.kz سايتى.
ۆەدومستۆونىڭ اتاپ وتۋىنشە، قازاقستان ازاماتتارى ءۇشىن گرۋزياعا ۆيزاسىز كىرۋ جانە وندا 365 كۇنگە دەيىن بولۋ رەجيمى ءالى دە ساقتالادى. الايدا، ءسىم مالىمدەگەندەي، بۇل رەجيم جۇمىسقا ورنالاسۋ قۇقىعىن بەرمەيدى.
مينيسترلىكتىڭ تۇسىندىرۋىنشە، گرۋزياداعى زاڭسىز ەڭبەك قىزمەتى اكىمشىلىك ايىپپۇلعا، 2 جىلدان 5 جىلعا دەيىن ەلگە كىرۋگە تىيىم سالۋعا، سونداي-اق ەلدەن شىعارۋعا اكەپ سوعادى.
«وسىعان بايلانىستى گرۋزيادا جۇمىسقا ورنالاسۋدى، كاسىپكەرلىك نەمەسە وزگە دە اقىلى قىزمەتتى جوسپارلاپ وتىرعان قازاقستان ازاماتتارىنا وسىنداي قىزمەتتى باستاماس بۇرىن گرۋزين زاڭناماسىندا كوزدەلگەن جۇمىس ىستەۋ قۇقىعىنىڭ بار ەكەنىنە كوز جەتكىزۋ قاجەت»، — دەپ ەسكەرتتى ءسىم.
مينيسترلىك سونداي-اق قازاقستاندىقتاردى گرۋزيانىڭ زاڭدارى مەن كوشى-قون ەرەجەلەرىن قاتاڭ ساقتاۋعا جانە ايىپپۇلعا، ەلدەن شىعارىلۋعا جانە كەيىننەن كىرۋگە شەكتەۋ قويۋعا اكەپ سوعاتىن بۇزۋشىلىقتارعا جول بەرمەۋگە شاقىردى.
بۇعان دەيىن «كۋرسيۆ» قىتايدا 15 قىركۇيەكتەن باستاپ كىرۋ جانە شىعۋ ەرەجەلەرىنىڭ جاڭا نۇسقاسى كۇشىنە ەنگەنىن جازعان بولاتىن. ۆيزا راسىمدەۋ كەزىندە نەمەسە شەكارالىق باقىلاۋدا جالعان مالىمەت بەرگەن شەتەلدىكتەرگە قحر-عا بەس جىلعا دەيىن كىرۋگە تىيىم سالىنادى.