سولتۇستىك قازاقستان وبلىسىندا ەل اۋماعىندا جۇمىس ىستەگەن ءىرى "Nomad Poker" ونلاين-كازينوسىنىڭ قىزمەتى توقتاتىلدى، دەپ حابارلايدى infohub.kz سايتى.
تەرگەۋ بارىسىندا كازينو "Club GG Poker" ءموبيلدى پلاتفورماسى نەگىزىندە قۇرىلىپ، ونى گرۋزيادا جۇرگەن قازاقستان ازاماتتارى ۇيلەستىرگەنى انىقتالدى. وسى سحەمانى پايدالانا وتىرىپ، ۇيىمداستىرۋشىلار وزدەرىنىڭ جەكە باسىن جاسىرىپ، قارجى اعىندارىن باقىلاۋدى قيىنداتىپ، شەتەل ازاماتتارىنا رەسىمدەلگەن شوتتار مەن بايلانىس قۇرالدارىن زاڭسىز قىزمەتكە پايدالانعان.
زاڭسىز ويىن پلاتفورماسى تاۋلىك بويى جۇمىس ىستەپ، ونلاين-پوكەر فورماتىندا اقشا ستاۆكالارىن ەنگىزىپ، ۇتىستاردى شىعارۋ مۇمكىندىگىن بەرگەن. جاڭا قاتىسۋشىلاردى تارتۋ ءۇشىن ۇيىمداستىرۋشىلار الەۋمەتتىك جەلىلەر، مەسسەندجەرلەر جانە جارناما قۇرالدارىن بەلسەندى پايدالانعان.
ناتيجەسىندە ونلاين-كازينوعا 20 مىڭنان استام پايدالانۋشى تارتىلعان. سونىمەن قاتار، ۇيىمداستىرۋشىلار ءۇشىنشى تۇلعالاردىڭ بانك شوتتارىن — دروپپەرلەردىڭ كەڭ جۇيەسىن قۇرعان. ول ءۇشىن كۇدىكتىلەر شەتەل ازاماتتارىنىڭ قازاقستانعا ۇيىمداسقان تۇردە كىرۋىن قامتاماسىز ەتىپ، ولارعا 400 دوللارعا دەيىن سىياقى ءۇشىن بانكتىك كارتالار مەن ءموبيلدى بانكينگ راسىمدەگەن.
ونلاين-كازينو قىزمەتىنە 60-تان استام دروپ-شوت پايدالانىلعانى انىقتالدى. ويىنشىلاردان تۇسكەن جالپى سوما 7،5 ملرد تەڭگەدەن اسقان.
تەرگەۋ قورىتىندىسى بويىنشا سوت الماتىداعى پاتەرگە، ءۇش اۆتوكولىككە، سونداي-اق دروپپەرلەردىڭ بانك شوتتارىنداعى 158 ملن تەڭگە كولەمىندەگى اقشاعا تىيىم سالدى. تەرگەۋ جالعاسۋدا.